Тываның Баштыңы Владислав Ховалыг «Спутник» микрорайонунда хөй каът чаа чуртталга комплекизиниң тудуун хынап чораан. 2030 чылга чедир аңаа ниитизи-биле 100 муң дөрбелчин метр ажыг ниити шөлдүг, 2007 квартиралыг 25 бажыңны тудары планнаттынган.
Владислав Ховалыг хыналдазы үезинде, тудугжулар 115 квартиралыг үш бажыңны ажыглалче кииргенин, 2026 чылда ам-даа 694 квартиралыг 10 тудугну дужаарын чугаалаан. Чиигелделиг ипотека программазы-биле 230 квартираны саткан. Бажыңнарның чамдыызын аварийлиг чуртталга бажыңнарын көжүрер программаның киржикчилеринге база өскүс уругларга үлээр. Бюджет акша-хөреңгизи-биле өскүс уругларга он квартираны садып алган.
«Бажың чанының девискээрлери чаагайжыттынган: уруглар ойнаар болгаш спортчу шөлдерлиг, автомашиналар тургузар черлиг, чурттакчыларга таарымчалыг байдалдарлыг. Чаа микрорайонга тудуглар ам-даа немежир, ынчанчаш инфратургузуг тудуун дүргедедир дээш ажылдаар: школаже болгаш микрорайонче орукту асфальтылап турар, а чоокку үеде светофорну тургузуп, чадаг кижилер эртер черлерни база кылыр» – деп, Владислав Ховалыг тайылбырлаан.
ТР-ниң Тудуг яамызының дыңнатканы-биле алырга, 2025 чылда федералдыг бюджеттен немелде акшаландырыышкын-биле чаа тудуглардан квартиарларны 75 өскүстер алыр. Амгы үеде белен квартираларны күрүне өнчүзүнче шилчидер ажыл чоруп турар, ооң соонда социал хөлезилел дугуржулгазы-биле оларны өскүс уругларга дамчыдар.
Аварийлиг ийи бажыңнарда чурттап турар 15 өг-бүле чаа тудуглардан халас чуртаар черлерни алыр. Судтуң шиитпири-биле чурттаарынга таарышпас болгаш өскээр көжүрер деп санаан Кызылдың Эрзинская кудумчузунда өрттен когараан 31 дугаарлыг база Каа-Хем суурнуң Пионерская кудумчузунда 26 дугаарлыг бажыңдан 15 өг-бүле чурттаар оран-саваланыр.
