Тываның Баштыңы Туран хоорайда кожууннуң төп ном саңынга четкен

Тываның Баштыңы Владислав Ховалыг Бии-Хем кожуунга ажылчын сургакчылаашкын үезинде, улуг септелге соонда ажыттынгаш чаа-ла бир ай болуп турар Туран хоорайда кожууннуң төп ном саңынга четкен.

1955 чылда туткан оран-савага улуг чаартылгалар чаңгыс-даа болбаан. Ынчалза-даа бо чылын, «Өг-бүле» национал төлевилелдиң «Өг-бүлениң үнелиг чүүлдери болгаш культура инфратургузуу» федералдыг программа боттандырылгазы-биле ном саңынга улуг септлегени кылган соонда, ол ам кожууннуң төп үлегер-майыктың ном саңы апарган.

Чаарттынган оран-савада номчулга залы, хуралдаар зал, чурт-шинчилел килдизи база информация-библиографтыг төп деп чаа девискээрлер ажыттынган. "Ном саңы амгы үеде интеллектуалдыг болгаш социал девискээр апарган. Келген чонга таарымчалыг байдалдар тургустунганындан, олар маңаа чаа билиглер болгаш солун чүүлдер дээш улуг сонуургал-биле кээп болур" – деп, Владислав Ховалыг бодунуң блогунда бижээн.

Амгы үеде Тывада 19 үлегер-майыктың ном саңы бар, объектилерни президентиниң «Культура» эгелээшкини-биле 2024 чылга чедир боттандырган.

Бо чылдан эгелеп программаны «Өг-бүле» национал төлевилел кылдыр уламчылап, ооң күүселдези-биле келир чылын республикада беш ном саңы: Улуг-Хем кожууннуң, Чаа-Хөл кожууннуң төп уруглар ном саңнары, Таңды кожууннуң Кочетов, Тес-Хем кожууннуң Берт-Даг көдээ ном саңнарының салбырлары база Өвүр кожууннуң Солчур көдээ ном саңы чаартынар. Бөгүнде белеткел ажылдары чоруп эгелээн.