2026 чылда Тывада школа назылыг 72,6 муң уругларның 19,9 муңун организастыг дыштанылга болгаш кадыкшылгаже хаара тудары планнаттынган. Июнь эгезинде республикада 183 чайгы лагерьлер ажыттынар. Чогуур албан черлерниң удуртукчулары республиканың чайгы лагерьлери уругларны уткуп алырынга канчаар белеткенип эгелээнин Тываның Баштыңы Владислав Ховалыгга илеткээн.
ТР-ниң Өөредилге яамызының дыңнатканы-биле алырга, республикада чайгы үеде 159 хүндүскү, 21 стационар, ийи майгын, бир күш-ажыл болгаш дыштанылга лагерьлери ажылдаары планнаттынган. Лагерьге дыштаныр путевканың ортумак өртээ – хүндүскү лагерьге 6537,3 рубль, майгыннарга – 5459,6 рубль, стационар лагерьге – 18776,2 рубль. Оон аңгыда, «Артек», «Океан», «Смена», «Орленок», «Алые Паруса» бүгү-российжи болгаш делегей чергелиг уруглар төптери Тываның уругларынга 99 путевканы тускайлаан.
Эде чаартылга болгаш септелге дарый негеттинип турган чамдык лагерьлерде ол ажыл эрткен чылын-на эгелээн. Чижээ, Ак-Довурак хоорайда «Таежный» лагериниң чемненир черин база эмчи пунктузун чаарткан. Бо чылгы ээлчегде ийи лагерь бар: Улуг-Хем кожуунда «Чодураа» база Тес-Хем кожуунда «Сайлык». Биргизинге дүрген тудуп үндүрер материалдар-биле ийи чаа чуртталга корпузун тудар болза, ийигизиниң чемненилге блогун болгаш медпунктузун чаартыр.
Тываның Баштыңы айыттынган ийи лагерьниң белеткелинде кандыг бергедээшкиннер барын билир — дыштанылга сезонун ажыдарынга чедир бүдүн чартык ай арткан-даа болза, ында ажылдар ам-даа доозулбаан. Ол ийи объектини бодунуң хыналдазынче ап, иштики хыналданы кылып, ажылдарның чоруп турарының дугайында неделя санында илеткээрин Чазак Даргазының оралакчызы Алексей Сазан-оолга ол дааскан.
Владислав Ховалыг күрүнениң онза сагыш човаашкынында уруглар дыштанылгазын организастаарынче база шак-ла ындыг улуг кичээнгейни угландырарын айыткан. Ындыг уругларга амыдыралдың берге байдалынга таварышкан өг-бүлелерниң ажы-төлү база хамааржыр. ТР-ниң Күш-ажыл яамызының сан-чурагайындан алырга, республикада 2,8 муң ажыг ындыг уруглар бар, республиканың уруглар лагерьлеринде олуттарны оларга республиканың акша-хөреңгизи-биле тускайлаан.
Оон ыңай 2,9 муң хире кижини лагерьлерже чиигелделиг путевка-биле дыштандырар. Оларның аразында тускай шериг операциязының киржикчилериниң 856 ажы-төлү, эвээш орулгалыг, хөй ажы-төлдүг болгаш долу эвес өг-бүлелерниң 1022 ажы-төлү, 227 өскүс уруг, ол-ла хире санныг кадыкшылы кызыгаарлыг уруглар, чепсектиг чөрүлдээлер, техногенниг айыыл-халаптар болгаш өске-даа онза байдалдардан когараан социал «айыылдыг» байдалда деп санаттынган 500 ажыг уруг бар.
Оон ыңай Луганск Улус Республика-биле дугуржулга езугаар, республиканың эрге-чагыргазы Лугансктан 100 хире уругну чайгы дыштанылгаже хаара тударын хүлээнип алган. Тыва оларның Ростов облазында кадыкшылга лагерьлеринге дыштанылгазын организастаар.
Уругларга лагерьлерден аңгыда, өске-даа организастыг дыштанылга хемчеглерин база көрдүнген. Чижээ, республиканың Күш-ажыл яамызы 14-18 харлыг элээди уругларны түр үениң ажылдары-биле хандырар. Чайгы дыштанылга үезинде 465 уругну ажылга хаара тудар дугуржулганы ажыл берикчилери-биле чарган. Культура бажыңнарынга, ном саңнарынга, спортчу школаларга түр үениң дыштанылга төптери база ажыттынар. Дыштаныр хүннерде уругларга экскурсиялар болгаш турисчи походтарны планнаан.
