Тываның Баштыңы Владислав Ховалыг Айыткалында тускай шериг операциязының киржикчи бүрүзүнге болгаш оларның өг-бүле кежигүннеринге деткимче бээр система эптиг болгаш ажык-чарлыг болур ужурлуг база билдириишкиннерни «чаңгыс көзенек» хевирге киирери эң таарымчалыг дээрзин демдеглээн.
Тываның Баштыңының Айтыышкынын ТР-ниң Күш-ажыл яамызы биле Хөй ажыл-чорудулгалыг төп күүседип, тускай шериг операциязының киржикчилеринден болгаш оларның өг-бүле кежигүннеринден документилерни чаңгыс билдириишкинге хүлээп алгаш, деткимчени көргүзер кылдыр харыысалгалыг күрүне албан черлеринче ол дораан чоруй баарын хандырар ажылды чорудуп турар.
Кызылда Хөй ажыл-чорудулгалыг төптүң дыңнатканы-биле алырга, февраль айда тускай шериг операциязының киржикчилеринден болгаш оларның өг-бүле кежигүннеринден 150 хире билдириишкин кирген. Нитиизи-биле 28 деткимче хемчээ бар. Уругларның дыштанылга үезинде хүлээп алыышкыннар каш катап көвүдей бээр.
ТР-ниң Күш-ажыл яамызы чаңгыс аай комплекстиг хевирге билдириишкин киирер ачы-дуза чедирилгезин уламчылап турар.
«Бо чылын Тываның Күш-ажыл яамызы Хөй ажыл-чорудулгалыг төп-биле керээни чарып алган. Бо хүнде чаңгыс аай комплекстиг билдириишкин киирер хевирже 13 деткимче көргүзүп турар Күш-ажыл болгаш социал политика, Кадык камгалал, Культура, Экономиктиг хөгжүлде, Арга-арыг болгаш бойдус ажыглалының яамылары кирген. «Чаңгыс көзенектен» тускай шериг операциязының киржикчилери болгаш оларның өг-бүле кежигүннери билдириишкин киирип тургаш, шупту деткимче хемчеглериние дугайында билип алыр. Чоорту Россияның Социал фондузунуң Тывада салбыры-биле кады ажылдажылга көрдүнүп турар» – деп, күш-ажыл болгаш социал политика сайыдының хүлээлгезин күүседип турар Орланмай Куулар чугаалаан.
Күш-ажыл яамызы республикада амыдыралдың аңгы-аңгы байдалдарынга таварышкан өг-бүлелерни амгы үеде деткип турар хемчеглер дугайында чат-ботту база ажылдаткан.
ТР-ниң чурагайлыг хөгжүлде сайыдының хүлээлгезин күүседип турар Эдуард Ховалыг «чаңгыс көзенек» сервизин февраль айда тест хевиринге ажылдатканын дыңнаткан.
«Чаа сервис тускай шериг операциязының киржикчилеринге болгаш оларның өг-бүле кежигүннеринге ачы-дуза алырынга эптиг болгаш дүрген болур. Олар чаңгыс билдириишкинни кииргеш, шупту деткимче хемчеглерин алыр. Бистиң яамы Тываның Чазаа база РФ-тиң Чурагайлыг хөгжүлде, харылзаа болгаш массалыг коммуникация яамызы-биле дугуржулга езугаар билдириишкиннерни күрүне ачы-дузалары порталы таварыштыр дужаар ажылды чорудуп турар. Порталда тускай шериг операциязының киржикчизиниң азы оларның өг-бүле кежигүннериниң эрге-байдалын бадыткап турар куар-код-биле спорт-культура хемчеглеринче олар кирип болур – деп, Эдуард Ховалыг чаа сервис дугайында таныштырган.
Тускай шериг операциязының киржикчизи чаңгыс аай комплекстиг билдириишкин киирер идеяны деткип турарын дыңнаткан. Ол күрүнеден көрдүнген деткимче хемчеглерин долузу-биле ап турар.
«Бо удаада машина башкарар шынзылга узадыр дээш келдим. Чаңгыс билдириишкин кииргеш, уругларның чемненилгезиниң өртээнге база хөй-ниити транспортунга чоруурунга компенсацияны, концерт көөр халас билет, санаторийже дыштаныр путевка дээш оон-даа өске деткимче хемчеглерин алыр таарымчалыг байдал тургустунганынга канчап өөрүвес боор» – деп, Кутузов орденниг гвардейжи 55-ки мото-адыгжы бригаданың дайынчызы чугаалаан.
Тывада тускай шериг операцияларының киржикчилеринге болгаш оларның өг-бүлелеринге мооң мурнунда көргүзүп турган күрүнеден деткимче хемчеглери бо чылын долузу-биле уламчылаар болгаш немежир. Эрткен чылын «Социал хөмүр-даш» төлевилелинче мөчээн, ис чок читкен, балыгланган дайынчыларның өг-бүлелерин киирген.
Бо чылдан эгелеп кемдээшкининден инвалид болган тускай шериг операциязының киржикчилеринге регионалдыг төлевирни доктааткан. Билдириишкинни чурттап турар чериниң аайы-биле Хөй ажыл-чорудулгалыг төп таварыштыр киирип болур.
#ТМГМедээлер #Тыва #Тывамедээ #Тывадыл #Тывамедиагрупп #Тува
