Тываның Баштыңының Чаа чыл елказынга муң хире уруг киришкен

В. Көк-оол аттыг национал хөгжүм-шии театрынга Тываның Баштыңының чаңчыл болган Чаа чыл елказы болуп эрткен. Школачыларны ийи аңгы бөлүктээн байырлалга республиканың 19 муниципалдыг тургузугларындан ниитизи-биле муң хире өөреникчи киришкен.

Бо удаада уруглар Пушкинниң тоолдарынга үндезилээн шиини сонуургап көргеннер. Елканың ийиги кезээнде “Харны кым оорлапканыл?” деп хөглүг көргүзүгнү көрген. Уруглар Соок-ирей база Харжыгаш-биле кады ырлап-хөглеп, самнааннар.

Бо чылын уруглар саны хөй: салым-чаяанныг, эки өөредилгелиг өөреникчилер, бичии спортчулар, аңгы-аңгы олимпидалар, хөгжүм мөөрейлериниң тиилекчилери, амыдыралдың берге байдалында таварышкан өг-бүлелерниң ажы-төлүнден аңгыда, тускай шериг операциязында киржип турар шериг албан-хүлээлгелиглерниң 450 ажыг уругларын база чалаан.

Оюн-тоглаалыг, ыры-шоорлуг программадан аңгыда, уругларга Тываның Чазааның бажыңынга солун экскурсияны организастаан. Оолдар, уруглар республика удуртукчуларының ажылдаар өрээлдерин база хуралдаар залдарны эргип, Ак бажыңның информация төвү – парлалга албанының студиязын сонуурганнар.

Тываның Баштыңының Елказынга тускай шериг операциязының киржикчилериниң ажы-төлүнүң чамдыызы аңгы-аңгы чылдагааннар-биле кээп шыдаваан. Ынчалза-даа оларга Чаа чыл белектерин кожуунда эртип турар байырлал хемчеглеринде тыпсыр. Ол өг-бүлелерниң ажы-төлүнче онза кичээнгейни салырын Тываның Баштыңы Владислав Ховалыг айыткан.