Тываның Баштыңының Кубогу дээш биче бут бөмбүүнге регионнар аразының маргылдаазы эгелээн

Ноябрьның 22-25 хүннеринде «Субедей» спорт комплекизинге, Тываның Баштыңы Владислав Ховалыгның Кубогу дээш биче бут бөмбүүнге регионнар аразында ийиги турнир болуп эртер. Киржикчи командалар Кызылче кээп эгелээн. Чеди оюннуң бирги маргылдаазы бөгүн 12.00 шакта эгелээн.

Сибирь регионнарының Иркутск облазындан «ИрАэро» база «Байкал 97», Хакасиядан «LiGaPro» командалар-биле кады шупту 10 команда кол шаңнал дээш мөөрейлежир.

Тываны «Сүбедей», «Эне-Сай», «Азияның төвү», «Мажалык ОПТИ», «Сбер», «Барум», ТР-де Онза байдалдар яамызының Кол эргелелиниң командалары төлээлээр. Олар шупту сентябрьда шилиде оюннарны эрткен.

Маргалдааның кол шииткекчизи – Мижит-Доржу Ужар-оол, кол секретары – Борис Кульбистеев.

Тиилекчи командаларны 500 000 рубль түңнүг шаңнал фондузундан акшаларны тыпсыр. «Тулган вратарь», «Тулган халдакчы», «Тулган ойнакчы» тускай шаңналдарны шылгарааннар алыр.

Регионнар аразының бо маргылдаазы ийи дугаар эртер, эрткен чылың сентябрьда бирги оюннар болганын сагындыраал. Маргылдааны ТР-ниң Спорт яамызындан аңгыда, Тываның Биче бут бөмбүүнүң лигазы эрттиржип турар.

Маргылдааның түңнел оюннары ноябрь 25-те 15 шакта эгелээр, кирери хостуг.