Бии-Хемниң Аржаан сумузунга Ада-чурт камгалакчызының чылынга тураскааткан кожуун чергелиг бичии болгаш элээди оолдар аразынга ай санында эртип турар хуреш маргылдаазы болуп эрткенин чагырга чери дыңнаткан.
Суму баштыны Буян Байкара маргылдааны ажыдып, мөгелерге чедиишкиннерни күзээн. Тус черниң чагыргазының удуртулгазы, сумунуң албан черлери тыва хүрешке сонуургалдыг оолдарны деткип, спортчу хемчеглерни демнежип эрттирип турар.
Маргылдаага 70 хире бичии болгаш элээди мөге ачыр-дачыр тудушкан. Оларны назы-хар аайы-биле беш аңгы бөлүкке чарган. Мөгелерни ада-иелер, тренер башкылар база тыва хүрештиң аарыкчылары деткип келген.
Хүреш маргылдаазының хүндүлүг аалчылары – Тываның чоргааралы, билдингир спортчулар Аян-оол Ондар биле Тумер Ондар өзүп орар мөгелерге спорту чедиишкиннерни күзээн. Олар келир үениң олимпийжи чемпионнарынга мастер-классты эрттирип, медальдарын сонуургаткан. Ужуражылга соонда, оолдар чемпионнар-биле төөгүлүг чурукка тырттыржып алганнар.
Дараазында хүреш маргылдаазы Хүт сумузунга болуп эртер.
