Бөгүн республиканың школаларында Тываның бирги Президентизи Шериг-оол Дизижикович Ооржактың чырык адынга тураскааткан класс шактары эртип турарын республиканың немелде өөредилге сайзырадыр төвү дыңнаткан.
Башкылар Ш.Д. Ооржактың кылып чораан ажыл-херээн уругларга таныштырган. Ол көдээ ажыл-агый специализинден регионнуң удуртукчузунга чедир амыдыралчы оруун эрткен. Улус-чонунуң мурнунга кезээде үлегер-чижектиг болуп келген.
Шериг-оол Ооржак регионну чурттуң нарын үелеринде, 1990 чылдарда, удуртуп турган. Россияга эде тургустунуушкун үелеринде төрээн чериниң салым-чолу дээш ажылдаар улуг харыысалга аңаа онаашкан. Мерген угааны, быжыг тура-соруктуу, төрээн Тывазынга кызыгаар чок ынакшылы-биле республиканың бурунгаар сайзыралының быжыг таваан салган.
Тываның бирги Президентизи Ш.Д. Ооржактың чырык овур-хевири төөгүге артар.
Апрель 11-де эртенгиниң 9-11 шак үезинде Кызыл хоорайда Национал хөгжүм-шии театрынга күрүне ажылдакчызы, республиканың бирги Президентизи Ш.Д. Ооржак-биле байырлажыр езулал эртер. ТР-ниң Баштыңының Чарлыы езугаар апрель 11-ни регионда кажыыдал хүнү кылдыр чарлаан.