Тываның Чазаа 2021 чылда кылган ажыл-чорудулгазының түңнелдерин республиканың чонунга илеткээр

Тываның Баштыңы Владислав Ховалыг 2021 чылда республика чазааның ажыл-чорудулгазының түңнелдериниң дугайында илеткелге атты салган. Үндезин хоойлуда айыттынганы езугаар ону Тываның Дээди Хуралынга илеткээр.

Чазак даргазының оралакчылары база сайыттар ажылчын коллективтер болгаш чон чыыштарында боттарының кылган ажылдарын таныштырар. Тускай хевирлеттинген ажылчын бөлүктер апрель 7-ден эгелеп республиканың хоорай, суурларже үнүп эгелээн.

Чугаалар чүүлдер-ле хөй. Пандемия турзажок, республиканың тудуг комплекизи шалыпчы ажылдаан. Чыл дургузунда 1800 хире объектини хары угда туткан. Он-он чылдарда туруп көрбээн чүүл – 108 муң дөрбелчин метр чуртталга шөлүн ажыглалга кииргени, боттуң тудуу өскениниң херечизи.

Тывага тудуглар, ылаңгыя чуртталга бажыңнарын тударын чугула, чүге дизе республика чаштар төрүттүнериниң талазы-биле Россияда ийи дугаар черде. Чаа эмнелгелер туттунуп, амгы үениң дериг-херекселдери-биле четчелеттинип, эмчи дузазының бедик технологиялыг хевирлерин шиңгээдип, амыдырал-чуртталганың шынары бедээниниң көргүзүү ында болуп турар.

Эки чүүлдер хөй, ынчалза-даа чон-биле ужуражылгаларда чүгле чаңгыс талалап, мактанып туруп бээри база шын эвес деп, Владислав Ховалыг айыткан. Чүнү, чүге кылып шыдаваанын, ону эдер дээн ажылдарын ажык-чарлыг чугаалаары кол деп, сагындырган.