Тываның Чазааның 2022 чылда ажыл-чорудулгазының түңнелдерин чон бедик үнелээн

Тыва парламентиниң Чөвүлели хуралын эрттирген. Дээди Хуралдың даргазы Кан-оол Даваа Моол күрүнениң Увс аймакка «Орус дылга ынак мен» деп оюнну эрттирерде парламент федералдыг деткимче алганын дыңнаткан.

Эрткен неделяда Каң-оол Даваа Роскадыажылдажылга федералдыг агентилелдиң удуртукчузу-биле ужурашканының түӊнелинде Евгений Примаков «Орус дылга ынак мен» деп делегей чергелиг төлевилелди бедик үнелеп, деткиирин аазаан.

Бо чылын оюннуң деңнели элээн улгадыр – Моолдуң Баян-Өлгий болгаш Ховд аймактарының, Алтай Республиканың Күрүне Хуралы Эл Курултайның төлээлериниң киржилгези манаттынып турар.

Оон ыңай Чөвүлел кежигүннери Тываның Чазааның отчеду-биле таныштырар ажылчын үнүүшкүннерге киришкенин чугаалаан. Хөй чагыгларның күүседилгези, ажыглалга кииртинген объектилерниң болгаш боттуг ажыл-херектерниң ачызында Тыва Чазактың 2022 чылда ажыл-чорудулгазының түңнелдерин чон бедик үнелеп турарын депутаттар онзалап демдеглээн.

Хурал үезинде үнүп келген неделяда чуртталга-коммунал ажыл-агыйыныӊ айтырыгларынга тураскааткан чон хүлээп алыышкыннары эгелээр. Оон аңгыда, Каң-оол Даваа депутаттарны айыыл чок чорук болгаш корум-чурум, малчыннарны деткиириниң, мал оолдаашкынының айтырыгларын хыналдага ап, кожууннарның удуртулгазы-биле доктаамал харылзаага турарынче кыйгырган.

Хуралдың төнчүзүнде Дээди Хуралдың даргазы апрель 1-ден эгелеп Тывада школаларның үндезин септелгези эгелей бээрин демдеглээн. Чоннуң соңгуттурганнары бо ажылдың шупту чадаларынга ооң шынары болгаш хуусааларын сагып турарынга хамаарыштыр хыналданы чорудар ужурлуг деп сагындырган.