Тываның чогаалчылары куда езулалынга йөрээл-сөстүг, белек-селектиг киришкен

Улус ажыл-агыйының чедиишкиннериниң делгелгези төөгүлүг, күш-ажылчы алдар индири болуп арткан. Бо үе-чадада чурттуң бурунгаар хөгжүлдезинче угландырган девискээрлер делгелгезинге Тыва Республика бойдузунуң каазы, чонунуң уран-шевери болгаш каргыраа-хөөмейи-биле онзаландыр көзүлгенин көрүкчүлерниң үнелели бадыткаан. Ылаңгыя тыва куда езулалын чон сонуургаан.

Делегей чергелиг бо улуг хемчеглерге Россияның Чогаалчылар эвилелинде бүрүн эргелиг бактаап бүрүткеттинген, ооң даргазы Н.Ф. Ивановтуң хүлээп көрүп, демниг ажылдап турар эвилели С.С. Комбунуң удуртканы Чогаалчылар эвилели идепкейлиг киришкен.

Эвилелдиң Москвада салбырының даргазы Борис Балчий-оол делгелге үезинде сенатор Л.Б. Нарусова, ТР-ниң культура сайыды В.С. Чигжит олар-биле ужурашкан. Россияның Чогаалчылар эвилелиниң секретары Тывага чорааш, “Тываже барыксап тур мен” деп чараш шүлүк бижээн сураглыг шүлүкчү, очулдурукчу Николай Переясловту делгелгеже чалаан. Ол делгелгеге бедик үнелелди бергеш, тыва чогаалчыларга байырымны чедирип көрүңер дээн.

Чогаалчыларның куда езулалынга йөрээл-сөстүг, белек-селектиг киришпезиниң аргазы чок болган. Чүге дизе чогаалчы Делгермаа Монгуштуң уйнуу оол өгленип турар. Борис Константинович Чогаалчылар эвилелиниң мурнундан өгленген аныяктар Начын Күнзен-оол биле Белекмаа Ондарга байыр чедирип, чараш йөрээлдерни салган. Тываның Улустуң чогаалчызы Артык Ховалыг “Өңдүр өкпең өң”, “Коңгулуур ыры” деп номнарын белекке сунгаш, аас-кежикти күзеп, байыр чедирген. Ном белээ эң үнелиг болду деп амыраанын Борис Балчий-оолга куда киржикчилери дамчыткан.

Начын Күнзен-оолдуң чогаалчы кырган-авазы Москваның хамааты байдалдың актылар бижидилгезиниң эргелели уругларынга бадылашканының дугайында шынзылга бижикти тывысканын дыңнаткан.

– Дүвүренчиг ажыл-иш төнген. Уйнуумнуң өг-бүле тудар езулалы солун эрти. Бүгү тыва чон, Москвада чурттап, ажылдап чоруур тывалар, ол ышкаш чогаалчылар Борис Константинович биле Артык Хом-Оттуковнаның деткип келгени өөрүнчүг болду. Тыва езу-чаңчыл-биле эрттирген куданы өске аймак чон дыка сонуургап турду. Моон-даа соңгаар ада-өгбелеривистиң сагып чораан чараш чаңчылдарын диргизип, суртаалдаары күзенчиг.

Эң бажында олбук салып турар ийи кыс кудашкылар аныяктарның авалары-дыр. Келинниң авазы – Альбина Борисовна Кызылда чаа ажыттынган терапияда нерв салбырының эргелекчизи, а күдээниң авазы мээң хирург эмчи уруум Айсу Александровна ол. Ачалары база ында ийи хой ужазын сунуп, хүлээдип турар Болат-оол Догбутович биле Мерген Владимирович.

Канчап өөрүвес боор! Залга олургаш, караам чажы өөрүшкүден бадып турду – деп, Делгермаа Конгаровна сагыш-сеткили-биле үлешкен.

“Улустуң чогаалчызы Артык Ховалыгның деткимчези-биле, чогаалчы Зоя Донгактың киржилгези-биле, чогаалчы кырган-ава Делгермаа Монгуштуң чалааны-биле бо кайгамчык куда езулалынга киржир аас-кежиктиг болдувус” – деп Б.К. Балчий-оол “Москвада Тываның чогаалчылары” сайтта бижээн.