Республиканың чурттакчы чонунга медицина дузазын сайзыраңгайжыдары-биле национал төлевилелдер күүселдези ам-даа уламчылаар. Тываның бүдүрүлгелеринде болгаш организацияларында база кожууннарда херээжен чонну калбаа-биле шинчип, хынаарынга ийи маммография аппарадын ажыглап турар.
«Узун болгаш идепкейлиг назын» национал төлевилелдиң кадык камгалалының эгеки чадазын эде чаартыр программазы-биле бо чазын ол аппараттарның бирээзи Чөөн-Хемчик кожуунда келген. Дөрт айның дургузунда 426 херээженнерни шинчилээн, оларның 199-зу Чадаана хоорайның чурттакчылары болгаш 227-зи аңгы-аңгы суурлардан келген. Республиканың Кадыкшыл болгаш эмчи профилактиказының төвүнде 2021 чылдан бээр ажыглап турар база бир маммограф аппарады бо чылын 33 үнүүшкүн үезинде 2017 херээжен кижини шинчээн.
ТР-ниң Кадык камгалал яамызының медээзи-биле алырга, үнүүшкүннүг шинчилге үезинде 137 аарыг илереттинген, ооң иштинде эмигде ыжыктыг 106 таварылга, ыжыкка чигзиниглиг 24 таварылга база 21 кижиде эмиг безиниң аденозазы илереттинген.
Кадык камгалалының эгеки чадазын эде чаартыр программазы-биле Бии-Хем биле Кызылдың төп кожуун эмнелгелери бо чылын стационарлыг маммографтарны алган. Апрельден бээр 483 херээженнер хыналданы эрткен.
Кадык камгалал яамызының эмчи сүмелеринден алырга, маммографияны 35 хардан өрү назылыг херээженнер эртер. 40 хар ажа бээрге, эмиг безиниң аарыгларын болдурбазы-биле чылдың-на хынадырын сүмелеп турар. Каш-даа хар-назылыг херээжен улус, бир эвес эмиглеринде кадыг чүүлдер тыптып, аарышкылыг апарза, азы хөректиң кежинде караңгы, кызыл черлер тыптып, чарлып, карталып турар болза, маммографияны эртери албан.
ТР-ниң Кадык камгалал яамызы херээжен чонну каш минута эртер шинчилелден кадыкшылын камгалап болур маммография хыналдазын албан эртерин кыйгырган.
Бирги эмчи-санитар дузазының системазын хөгжүдери – «Кадык камгалал» национал төлевилелдиң база амгы «Узун болгаш идепкейлиг назын» чаа национал төлевилелдиң кол угланыышкыннарының бирээзи. Ол угланыышкын-биле суурларга амгы үениң фельдшер-акушер төптерин тударын, көжүп чоруур эмнелге комплекстери-биле хандырарын, профилактиктиг эмчи шинчилгелерин чылдың-на организастаар. Россияның Президентизи Владимир Путинниң эгелээни национал төлевилелдер 2019 чылда эгелээнин сагындыраал.