«Чаа үеге күштүг идеялар» шуулганга киржирде Тываның чурттакчылары боттарының сайгарлыкчы санал-оналдарын идея.конгресс.рф шөлчүгешче июнь 15-ке чедир кииреринче чалап турар. Бо улуг хемчээлдиг хемчег Россияның хамаатыларының чурттуң бот-догуннаашкынын быжыглаарынга болгаш хөгжүлдениң национал сорулгаларын чедип алырынга улуг үлүг-хуузун киирер ниитилел ужур-дузалыг эгелээшкиннерин илередиринге болгаш оларны боттандырарынга деткимчени көргүзеринче угланган.
Шуулганны Стратегтиг эгелээшкиннер агентилели база Росконгресс фондузу организастаар, ону ВЭБ.РФ биле Нижегород облазының Чазаа кады эрттиржир.
Бо чылын алды дугаар эртип турар шуулганга ындыг бодалдарны болгаш төлевилелдерни кады сайзырадып, чыып, сайгарып чугаалажыры-биле экономика, технологтуг болгаш социал хөгжүлде, коммерцияга хамаарышпас организациялар, өөредилге, хоорай хүрээлеңи болгаш экология адырларында лидерлер болгаш эксперттер, күрүне болгаш сагыш човаачал хамаатылар төлээлери чыглыр.
«Шуулган бүгү Россияның келир үезин өскертип болур идеяларны тургузарынга белен угаан-сарыылдыг болгаш тоомча чок эвес кижилерниң күжениишкиннерин каттыштырарынга дузалаар. Ынчангаш чаңгыс чер чурттугларывысты идепкейин көргүзүп, билдириишкиннерин кииреринче кыйгырдывыс. Идеяларның санында кызыгаарлаашкын чок, төлевилелдерни хуу кижилер-даа, организациялар-даа киирип болур» – деп, Тываның экономиктиг хөгжүлде сайыды Аяс Баян тайылбырлаан.
2026 чылда беш угланыышкыннарга идеяларны хүлээр:
- национал социал эгелээшкин;
- национал кадр эгелээшкини;
- национал технологтуг эгелээшкин;
- экология болгаш агаар-бойдус угланыышкыны;
- национал сайгарлыкчы чорук эгелээшкини.
Бо чылдың шуулганының онзагай талазы – кылымал угаан технологияларын калбаа-биле ажыглаар. Кылымал угаан идеяны үнелээринге дузалажыр, эчис сорулгалыг угланыышкыннарны ханы сайгарар, төлевилелдер-биле улаштыр ажылдаар эгелээшкиннерни тема аайы-биле чыыр.
Сөөлгү алды чылдың шуулганынга Россияның шупту регионнарындан аңгыда, делегейниң 45 чурттундан төлээлер киришкен. Чүгле 2025 чылда авторлар 35 муң ажыг эгелээшкинни киирген, ол баштайгы шуулганның көргүзүүнден ийи катап хөй.
Эрткен чылын аңаа хуу сайгарлыкчы Н.В. Донгур, хууда сайгарлыкчы Монгуш М-Ч.А., «Студия Артха», «Лана Софт», «Вавиол», «Озун» кызыгаарлаан харыысалгалыг ниитилелдер, «Белдир» көдээ ажыл-агый бүдүрүлге кооперативи Тываны төлээлеп киришкен.
Эксперттер шупту киирген билдириишкиннерден 100 эң-не тулган идеяны шилиир. Июль 22-23 хүннеринде, Россияның Президентизи Владимир Путинниң киржири түңнел хемчегге, эң шыырактар киржир.
