Тыва одалга сезонун эгелээринге белен. Шупту белеткел ажылдары доозулган, муниципалдыг тургузуглар чагыргазы чогуур шиитпирни хүлээп алган соонда, чылыг хандырылгазы дораан эгелээр – деп, регионнуң одаар чүүл болгаш энергетика сайыды Эдуард Куулар дыңнаткан. Сентябрь 15-тен 20-ге чедир төпчүткен чылыг хандырылгалыг чурттакчылыг черлериниң хөй кезиинче чылыгны берип эгелээри планнаттынган.
«Элээн каш хонук дургузунда агаарның ортумак температуразы сес градустан соор болза, төпчүткен чылыгны бээр дугайында шиитпир хүлээп алдынарын билир бис. Кызылдың чылыг-энергетика төвү база муниципалдыг тургузугларда өске-даа котельнаялар – чылыг хандырылга объектилери ажылдаарынга бүрүнү-биле белен» – деп, сайыт демдеглээн.
Республикада чуртталга бажыңнарын болгаш социал объектилерни чылыг-биле хандырар албан черлери эки белеткенгенин хыналдалар бадыткаан.
Августа ажылдап эгелээн оттулар чүүл шыгжамырлары чонну хөмүр-биле хандырып турар. Чурттакчы чон хөмүрнү складтардан база Каа-Хем биле Чадаананың хөмүр-даш уургайларындан дорт садып ап болур. Уургайларда ооң өртээ бир тоннада 2925 рубль болза, оон складтарже сөөртүп чедирген өртек-биле база садып ап болур.
Бодун шынзыткан документизи биле QR-кодун көргүскеш, чурттакчы чонга тургускан өртек-биле уургайдан хөмүрнү бодунга садып алыр – деп, Эдуард Куулар сагындырган. «Хөмүр-даш продукциязы» ГИС системазынга бүрүткеткеш, азы Кызылдың мэриязы, кожуун чагыргазы, ол ышкаш хөй талалыг ажыл-чорудулгалыг төптерге четкеш, ону билип ап болур. Бир эвес системада бергедээшкиннер тургустуна бээр болза, Тываның одаар чүүл болгаш энергетика яамызының консультантыларының 8 (39422) 5-15-49 дугаарлыг телефонунче долгааш, тайылбырны ап болур.
Системага ооң мурнунда бүрүткедип алган улус ону катап кылдырбас, QR-кодуңар хууда кабинедиңерде шыгжаттынып чыдар. Чаа туткан бажыңнар ээлери чаа оран-савазының айыттынган шөлдери-биле бүрүткелди эртер ужурлуг.