Тываның чылыдылга-энергетика комплекизинге муң ажыг тускай мергежилдиг кадр херек

Тываның Чазааның ээлчеглиг хуралында кадрлар талазы-биле айтырыгны көдүрген. Регионнуң Одалга болгаш энергетика яамызы айтырыгның нарынын өөренип көргеш, чылыдылга-энергетика комплекизин сайзырадып хөгжүдер эчис сорулгаже энергетика бүдүрүлгелеринге кадрлар белеткээрининиң хемчеглерин немей киирерин саналдаан.

ТР-ниң Одалга болгаш энергетика яамызыныы-биле алырга, бо хүнде адырда 2509 кижи ажылдап турар. Эксперттерниң 10 чыл бурунгаар көрүжү-биле санаарга, чылыдылга-энергетика комплекизинге 1023 кадр херек, ооң иштинде 250 инженер, 773 – ажылчын мергежилдер.

Чер адааның тывыжынга даг ажылчыннары, экскаватор, үттеп-өрүмнээр дериг-херекселдер, үндүр сөөртүр база чүдүрүп-дүжүрер машиналар машинистери, слесарьлар, аңгы-аңгы угланыышкыннарлыг электромонтерлар, чылыг четкизиниң операторлары, котелдар болгаш турбиналар машинистери, электрогазосварщиктер, чылыг четкилериниң дериг-херекселдерин септээр слесарьлар амгы үеде дыка херек.

Республиканың элээн каш техникумнарының баазазында ажылчын мергежилдер кадрларын белеткеп турар. Колдуунда-ла даг-техниктиг, политехниктиг база транспорт техникумнары чылдың-на чүс-чүс ажылчыннарны белеткеп турар.

Тываның күрүне университедин «Электри энергетиказы база электри техниказы» программазы-биле 20 тускай мергежилдиг кадр чылдың-на доозуп турар. 2024 чылда «Электри- база чылыг техниказы» угланыышкынныг сес тускай мергежилдиг база «Электри хандырылгазы» программаны 11 кижи бир-ле дугаар доозуп үнген.

Регионалдыг чылыдылга-энергетика комплекизиниң кадрларының назы-хары улгадып, кадрларның чедишпес айтырыын республика бодунуң күжү-биле шиитпирлептер дээрзинге яамы бүзүрелдиг. Аныяктарны энергетика адырынга хамаарышкан мергежилдерге өөрениринче сонуургадып, өөредилге программаларында мергежилдер болгаш билиглер даңзызын калбартып, комплекстиң бүдүрүлгелери биле профессионал өөредилге албан черлериниң аразында сырый ажылдажылганы хандырап, ол ышкаш бүдүрүлгеге чаа технологияларны идепкейлиг ажыглап, аныяктарның профессионал болгаш депшилгелиг дүрген өзүлдезинге үлүг-хууну киирери чугула.

Аналитиктерниң баш бурунгаар көрүүшкүнү-биле, чылыдылга-энергетика комплекизинде инженерлер болгаш ажылчыннарның чедишпезин шинчилекчилер баш бурунгаар көрүп турар, ол дээрге чүгле Тывада эвес, а бүгү чуртта узун хуусаада боттандырар ниити угланыышкын болур. Чүгле бүдүрүлгелерниң боттарының күжү-биле ол чайлаттынмас, а күрүнениң талазындан дээштиг хемчеглер херек. Ылаңгыя ЧЭК-тиң хереглелин өөренип көргеш, чыл санында кадрларны белеткээриниң болгаш эде өөредириниң күрүне чагыын республика деңнелинге хевирлеп тургузар.