«Тываның маадырлары» кадрлар программазының киржикчилеринге экономика болгаш саң-хөө талазы-биле ийиги өөредилге курстары эгелээн.
Бо удаада Тываның күрүне университединиң эртемденнериниң удуртулгазы-биле киржикчилер регионалдыг сайыттарның болгаш оларның оралакчыларының практиктиг арга-дуржулгазынга даянып, келир үениң лидерлериниң эчис сорулгалыг боданыышкынын сайзырадырынга эргежок чугула бюджет болгаш үндүрүг системаларын, рынок байдалын сайгарып, болуп болур айыылды шинчилеп, саң-хөө курлавырларын башкарып өөренирлер.
«Киржикчилер ийи неделя дургузунда күрүне болгаш муниципалдыг удуртулганың кол угланыышкыннарын: республиканың инвестиция политиказындан эгелээш, үлетпүр адырының болгаш күш-ажыл рыногунуң тускайлаңынга чедир өөренир» – деп, Тываның Баштыңы Владислав Ховалыг бодунуң телеграм-каналында дыңнаткан.
Келир үениң удуртукчуларының шупту угланыышкыннарга сайзыралын модуль программазы хандырар кылдыр тургустунган. Ында спортчу сам эвилелиниң президентизи Максим Овчинников-биле бал хореографиязынга мастер-класс база Тыва улустуң хөөмейжизи Игорь Көшкендей-биле кичээл база бар. Ол ышкаш психология кичээлдери, хүннүң-не эртенги шимчээшкиннер, «Тайга» станциязынга спортчу хемчеглер, эштири база кирген.
Төлевилелдиң киржикчилери бүгү чуртта болгаш республикада хөй-ниити хемчеглеринде киржип турар. Чижээлээрге, Россияның Маадыры база «Тываның маадырлары» кадрлар төлевилелиниң киржикчизи Буян Куулар баштаан Тывадан тускай шериг операциязының хоочуннар делегациязы декабрь 9-тан 11-ге чедир Москваның «Россия» Национал төвүнде «Кады тиилээр бис» деп үшкү шуулганда киржип турар.
Шуулганның хүн чурумунда тускай шериг операциязының хоочуннарынга социал адаптация болгаш комплекстиг деткимче, оларны ажылче болгаш спортче хаара тудар, аныяктарның ада-чуртчу кижизидилгезинче угланган айтырыгларны көөр. Шуулган тускай шериг операциязының хоочуннарын болгаш оларның өг-бүлелерин бүгү талазы-биле деткиир фондунуң кол сорулгазын күүседиринче угланган кады чугаалажыышкыннарның, шиитпирлерни ажылдап кылырының кол шөлү апаар.