Тываның Дээди Судунуң баштайгы аалчылары

Чаа чылда ТР-ниң Дээди Судунуң баштайгы аалчылары – Кызылдың бир дугаар школазының сески клазының өөреникчилери болганын суд чери дыңнаткан. Ужуражылганы уругларның профугланыышкынынга тураскааткан.

Школачылар Россияның бүгү суд системазының, Дээди Судтуң тургузуунуң дугайында, суд чорудулгазы-биле танышкан. Олар суд системазының төөгүзүнүң музейин, судтуң хуралдар эрттирер залдарын сонуургап көргеннер.

Уруглар кыдат болгаш моол хаанныг күрүне үезинде кем-херек үүлгеткеннерге кандыг кеземче ялазын онаап, совет үеде шииткекчилерни канчаар соңгуп турганын билип алганнар. Оларның аразында келир үеде эрге дугайында эртемнер-биле салым-чолун холбаштырар күзелдиг уруглар эвээш эвес болган.

Школачылар-биле кады башкылар болгаш ада-иелер база келген. Аалчылар ужуражылгадан дыка хөй ажыктыг болгаш солун чүүлдерни билип алганын демдеглеп, эрттирикчилерге четтиргенин илереткен.

Тываның Дээди Судунуң ажыл-чорудулгазын аныяк-өскенге сонуургадып, аңгы-аңгы хемчеглерге киириштирерде, шүүгү чериниң парлалга албаны-биле дараазында дугаарже долгааш, харылзажып болур: 9-48-31.