Тыва чоокку үш чылда аалчылар чурттаар оран-савага 260 өрээлди немей тударын планнаан. 2025 чылда «Туризм болгаш аалчылар хүлээп алыышкыны» национал төлевилел шугуму-биле республикага модульдуг аалчылар бажыңнарын тудар программага субсидияны берип эгелээр.
Бо национал төлевилел езугаар РФ-тиң Экономиктиг хөгжүлде яамызының чарлаан мөөрейинге Тыва киришкеш, турисчи баазалар тудуунга ниитизи-биле 379 сая рубль түңнүг үш инвестиция төлевилелин камгалап алган.
Мөөрейже республиканың киирген 19 төлевилелинден «Сибирь Энерго» КХН биле «СПК» КХН-ниң белеткээн төлевилелдери шилиттинген. Ол дээрге Новосибирск компаниязының Хадың болгаш Дус-Хөл хөлдеринге дыштанылга баазазын база “СПК”-ның Каа-Хем кожуунга «Белдир» баазазын тудар төлевилелдери-дир.
Хадың биле Дус-Хөл дыштанылга черлеринге аалчылар чыттырар таарымчалыг өрээлдерлиг, дыштаныр шөлдерлиг, хөй ажыл-чорудулгалыг турисчи комплекстерни тудар. А бүгү талазы-биле таарымчалыг байдалдарлыг «Белдир» турисчи баазаны паралимпий оюннарының киржикчилерин, инвалид спортчуларны белеткээр болгаш катап күш киирер төп кылдыр кылыр бодалдыг.
Ажык медээлерден алырга, төлевилелдиң киржикчилери боттары турисчи инфраструктура-биле харылзаалыг бизнесте чаа киржип эгелээн. Тудуг талазы-биле тускай мергежилдиг «СПК» компания Тывага чүгле ийи чыл бурунгаар тургустунган. Тускай шериг операциязының хоочуну Ай-Хаан Торуш ону удуртуп турар.
2015 чылда Новосибирск хоорайга тургустунган «Сибирь Энерго» компанияның кол ажыл-чорудулгазынга туризм адыры кирбейн турган. Ынчалза-даа туризм адырында төлевилелдерге, ылаңгыя Тывага, сонуургалдыын ол илереткен. Компания 2023 чылда Каа-Хемге суг оруунуң турларын организастаары-биле регионалдыг конкурсту ойнап алган.
ТР-ниң туризм талазы-биле комитеттиң дыңнатканы болза, төлевилелдер боттандырылгазынче субсидиялар бээр дугайында дугуржулганы ийи тала чарар. Келир үениң баазаларының кол онзагайы – белен модульдардан эптей салып тудуптар тудуглар болур. Херек апаар болза, тудугну часкаш, өске черже көжүрүп, азы эде тудуп, азы немей тудуп болур.
