Тываның школа назыны четпээн уругларның өөредилге системазында 25 муң ажыг чашты хаара туткан аңгы-аңгы хевирниң 221 өөредилге албан чери бар. Бо албан черлеринде 5000 ажыг кижизидикчи башкы болгаш ажылдакчы чаштарның мага-бот, угаан-медерел болгаш сагыш-сеткил сайзыралынга таарымчалыг байдалдарны тургузар дээш хүннүң-не ажылдап турар.
Уруглар садтарында уругларга таарымчалыг байдалды тургузары, удур-дедир харылзаштырып өөредири, угаан-медерелин сайзырадыры, төрээн культуразынга болгаш чаңчылдарынга ынакшылды оттурары оларның ажыл-чорудулгазынга хамааржыр.
Кызылда Тываның күрүне филармониязынга байырлал бүдүүзүнде, республиканың школа назыны четпээн уруглар өөредилгезиниң шыырак ажылдакчыларын байырлыг байдалга шаңнаан.
ТР-ниң Чазак Даргазының оралакчызының хүлээлгезин күүседип турар Алексей Сазан-оол база Тываның өөредилге сайыдының хүлээлгезин күүседип турар Орлан Соян байырлыг хемчегниң киржикчилеринге байырны чедирген. Кижизидикчи башкы хүнүнге тураскааткан хемчегге Тываның Баштыңының күрүне шаңналдарын болгаш мактал бижиктерин тывыскан.
«Тыва Республиканың өөредилгезиниң алдарлыг ажылдакчызы» бедик атты Мөңгүн-Тайга кожууннуң Мугур-Аксы суурда «Чечек» уруглар садының эргелекчизи Валентина Ондарга тывыскан.
Каа-Хем кожууннуң Суг-Бажы суурда “Шончалай” уруглар садының эргелекчизи Рита Койгунмай, Барыын-Хемчик кожууннуң Барлык суурда “Салгал” уруглар садының эргелекчизи Наталья Ооржак, Чаа-Хөл кожууннуң Чаа-Хөл суурда “Хүнчүгеш” уруглар садының таңныылы Маадыр Халыын Тываның Баштыңының Хүндүлел бижиктери-биле шаңнатканнар.
Тываның Баштыңының Өөрүп четтириишкин бижиин Мөңгүн-Тайга кожууннуң Мугур-Аксы суурда «Чечек» уруглар садының хөгжүм башкызы Эртине Хертек, Мөңгүн-Тайга кожууннуң Мугур-Аксы суурда «Чечек» уруглар садының улуг кижизидикчи башкызы Аяна Иргит, Каа-Хем кожууннуң Сарыг-Сеп суурда “Родничок” уруглар садының эргелекчизи Херелмаа Иргит-оол алганнар.
Профессионал башкылар ниитилелиниң эгелээшкини-биле 2004 чылда башкылар хүнүн бир дугаар демдеглеп эгелээнин сагындыраал. Ол хемчег 2016 чылда албан езузунуң эрге-байдалын алгаш, күрүне байырлалдарының календарынче кирген.