ТР-ниң Экономиктиг хөгжүлде болгаш үлетпүр яамызының бизнес-десантызы тус черниң сайгарлыкчыларынга тайылбырлыг болгаш методиктиг дузаны көргүзери-биле республиканың кожууннарынче үнүүшкүннерни организастаан.
Командада Сайгарлыкчы чорукту деткиир фондудан, Магадылал фондузундан, Инвестиция хөгжүдер агентилелден, “Россияның деткимчезиниң” регионалдыг салбырындан, Росхереглелхайгаарал база үндүрүг албанындан тускай мергежилдиглери кирген.
Сентябрь эгезинде эгелээн төлевилелде тускай мергежилдиглер бо хүнге чедир Эрзин, Тес-Хем, Бай-Тайга, Барыын-Хемчик, Өвүр кожууннарга база Ак-Довурак хоорайга чедип, бизнес-десантының организастааны семинарларже биче болгаш ортумак сайгарлыкчы чоруктуң 50 ажыг субъектини хаара туткан. Төлевилелдиң киржикчилери кожууннарындан үнмейн, халас ачы-дузаны ап, сонуургааны айтырыгларын салып, чедимчелиг харыыларны алыр аргалыг болганнар.
Ужуражылгалар үезинде, амгы үениң күрүне деткимчелерин, барааннарга «Шынчы демдек» марка системазын ажыглаарын, саң-хөө аргаларын, ооң иштинде микрочээлилер алырын болгаш дагдыныкчы болурун база өөредилге программаларын сайгарып чугаалашканнар. Эгелеп чоруур сайгарлыкчылар бизнезин бүрүткедиринге, саң-хөө болгаш үндүрүг айтырыгларынга хамаарыштыр консультацияларны ап, а арга-дуржулгалыг сайгарлыкчылар боттарының ажыл-херээн ажыдарынга базым бүрүзүнүң арга-сүмелери-биле үлешкен.
Октябрь төнчүзүнге чедир уламчылаар төлевилел шупту кожуун төптерин хаара тудар. Дараазында график езугаар үнүүшкүннер планнаттынган.
• Октябрь 2
10:00 - Чаа-Хөл кожууннуң Чаа-Хөл суур;
15:00 - Улуг-Хем кожууннуң Шагаан-Арыг хоорай;
• Октябрь 9
10:00 - Чеди-Хөл кожууннуң Хову-Аксы суур;
• Октябрь 16
10:00 - Таңды кожууннуң Бай-Хаак суур;
• Октябрь 23
10:00 - Бии-Хем кожууннуң Туран хоорай;
• Октябрь 30
10:00 - Каа-Хем кожууннуң Сарыг-Сеп суур;
14:00 - Кызыл кожууннуң Каа-Хем хоорай хевирлиг сууру.