Тываның Баштыңы Владислав Ховалыг республиканың кожууннарында бензин кудар станцияларның ээлери-биле ужурашкан. Ужуражылга үезинде регионнуң кывар-чаар чүүл рыногунда амгы байдалды сайгарып, бензин өртээн турумчудуп, ону үзүктел чок хандырарының талазы-биле санал-оналдарны солушкан.
Владислав Ховалыг сайгарлыкчыларга Энергетика яамызы-биле удур-дедир боттандырар хүлээлгелерин айыткан кады ажылдажылга дугуржулгаларын чарарын саналдаан.
Тываның Энергетика болгаш чуртталга-коммунал ажыл-агый яамызының база Монополияга удур федералдыг албан чериниң Тывада эргелелиниң төлээлери ужуражылгага киришкен. Энергетика сайыды Эдуард Куулар бүгү чуртта кывар-чаар чүүлдер хандырылгазы кызыгаарлыг хевээр дээрзин дыңнаткан.
Россияның нефть болбаазырадыр заводтарынче украин дроннарның халдаашкыннары-биле кызыгаарлаашкыннар холбаалыг. Россияның Чазаа бүгү чуртта кывар-чаар чүүл хандырылгазын экижидер дээш, хүннүң-не улуг күжениишкиннерни үндүрүп турар. Федералдыг эрге-чагыргалар Тверь, Тамбов, Новосибирск, Нижегород областар, Алтай край база Бурятия, Хакасия, Саха (Якутия), Тыва республикалар дээн ышкаш регионнарның кывар-чаар чүүл хандырылгазын онза хыналдада алган.
Республиканың кывар-чаар чүүл-биле хандырылга айтырыы федералдыг хыналдада дээрзин Владислав Ховалыг демдеглээн. Россияның Чазааның Даргазының оралакчызы Александр Новак баштаан федералдыг ажылчын бөлүк хүннүң-не мониторингини чорудуп турар. ТР-ниң Чазак Даргазының оралакчызы Артыш Кыргыс баштаан ажылчын бөлүк база тургустунган. Федералдыг деткимче хемчеглериниң ачызында республикага кывар-чаар чүүлге херек хемчээлдиң хандырылгазын арттырган.
Владислав Ховалыг «Роснефть», «Газпром нефть» база «Лукойл» нефть болгаш газ улуг компанияларының удуртулгазы-биле кывар-чаар чүүл хандырылгазынга хамаарыштыр доктаамал харылзааны тудуп турарын демдеглээн. Амгы үеде республика девискээринче улаштыр хуваар бензинниң улуг партиязын сөөртүп эккээрин дугуржуп турарлар.
Тываның Баштыңы аңаа хамаарыштыр хуу бензин кудар станциялар төлээлери-биле таарымчалыг өртек политиказының дугайында дугуржулгаларны чарарын саналдаан. Боттарының арга-шинээн санап, моон-даа соңгаар кады ажылдаарынга хамаарыштыр санал-оналдарны киирерин сайгарлыкчыларга сүмелээн.
Бии-Хем, Чөөн-Хемчик, Таңды кожууннарда бензин кудар станциялар төлээлери кады ажылдаар күзелин илеретсе-даа, сайгарлыкчылар сөөлгү үеде кывар-чаар чүүл садып алырынга бергедээшкиннеринге таваржып турарын дыңнаткан. Кол бергедээшкин – мөөңнеп садар хандырыкчылардан садып алыр өртектерниң аарында.
Ужуражылганың түңнелинде, ийи тала республиканың кывар-чаар чүүл рыногунда өртек политиказын турумчударынга база төнчү хереглекчилерге бензинниң өртээнге салдар чедирер ужурлуг кады ажылдажылгага беленин илереткен.
Энергетика яамызы бензин кудар станциялар ээлери-биле кады ажылдаарының арга-хевирлерин болгаш дугуржулганың төлевилелин ажылдап кылыр даалганы алган.
«Тус черниң кывар-чаар чүүл кудар станциялар ээлери чаңгыс чер чурттугларының мурнунга харыысалгазын билип, кады ажылдажылгага белен болганы эки-дир. Россияның Чазаанга болгаш нефть компанияларының удуртулгазынга Тываны деткип турары дээш четтиргеним илереттим. Айтырыгны көрүп, ону хүннүң-не шиитпирлеп, чурттакчыларның сонуургалдарын камгалаары-биле бүгү-ле аргаларны кылып турар бис. Кылыр чүүлдер хөй, ынчангаш ажылдар ам-даа уламчылаар. Чуртта амгы байдалды база билип көөрүн дилеп тур мен» – деп, Владислав Ховалыг заправка ээлери-биле ужуражылга соонда демдеглээн.
