Тываның Баштыңы Владислав Ховалыгның Дээди Хуралдың депутаттарынга Айыткалында айытканы езугаар, Тываның Чазаа бирги хереглелдиң аъш-чем аймаанга өртектерни турумчудар ажылды уламчылап турар.
Экономиктиг хөгжүлде болгаш үлетпүр яамызының ажылдап кылганы өртектерни турумчудар талазы-биле хемчеглер планы езугаар, «Кукуруза» садыглар четкизиниң ээзи болур «ИТ-Коннект» КХН-биле бо хүннерде дугуржулга чардынган. Февральда элээн каш улуг садыг четкилерин, ооң иштинде бистиң регионда ажылдап турар “Пятерочка” биле “Батон” садыгларның башкарыкчызы X5 Group аъш-чем компаниязының кол организациязы - “ИКС 5 Корпоративтиг төп”-биле ындыг дугуржулга чардынганын сагындыраал.
Бо дугуржулга Тываның садып алыкчыларының бирги хереглел барааннарынга өртек-үнениң хенертен өзеринден камгалап, садыглаашкында немелде өртектер салыышкынын кызыгаарлаар. Садыгларны чугула херек продуктуларның янзы-бүрү хевирлери-биле хандырарын дугуржулга магадылаар.
Ийиги чарган дугуржулга-биле, Тывада “Пятерочка”, “Батон” база “Кукуруза” садыг четкилеринде өртектер турум апаар.
«Кукуруза» садыы тус черниң бараан бүдүрүкчүлериниң продукциязын идепкейлиг садып-саарып турарын республиканың Экономиктиг сайзырал болгаш үлетпүр яамызы демдеглээн.
Садыгның делгүүрлеринден «Тайга17» брендиниң экопродукциязын, тус чер бараан бүдүрүкчүлериниң сүт продукциязын, «Белдир» КБК-ның чиг эъттен белеткээн продукциязын, «Бай-Хаак аква» КХН-ниң, «Озун» КХН-ниң арага чок суксуннарын болгаш сугларын дээш, өске-даа аъш-чем аймаан тып ап болур. Алдынган хемчеглер чүгле өртектер өзүлдезин чайладырынга дузалаар эвес, а тус черниң бизнезин деткип, чурттакчы чонну шынарлыг болгаш чиик өртектиг продукция-биле хандырар.
Республиканың муниципалдыг тургузугларынга дыштаныр хүннерниң ярмаркаларын эрттирери - тус чер рыногунда өртектерни чурумчудар талазы-биле ажылдың чугула кезээ апарган. Ол шөлдер бүдүрүкчүлерге садып алыкчылар-биле дорт харылзажыр арганы берип, дугуруштурукчу чокка барааннарның өртээн эвээжедир арганы берип турар. Бо чылдың эгезинден бээр 39 ярмарка эрткен, аңаа 465 бүдүрүкчүлер киришкен. Чоокку үеден бээр “Азия” рыногунда неделя санының дыштаныр хүннер ярмаркалары болуп турар – ынаар бүдүн республиканың көдээ ажыл-агый бараан бүдүрүкчүлерин чалаан.
Муниципалитеттер боттарының чурттакчылыг черлеринде садыгларда байдалды хайгаараар дээш, аъш-чем өртектерин неделя санында хынап,. мониторинг түңнелдерин ТР-ниң Экономиктиг хөгжүлде яамызынче неделя санында киирип турар. Херек үелерде, чижээ байырлал хүннеринде, ындыг хыналдаларны бо-ла чоруда бээр.
