Тываны хөгжүдериниң келир үеде угланыышкыннарын таныштырар

Бо чылын Красноярскиниң экономиктиг шуулганының темазы – Сибирьни хөгжүдериниң айтырыы болур.

Тываның Баштыңы Владислав Ховалыг баштаан делегация Красноярскиниң экономиктиг шуулганы-2023 шөлүнге регионнуң инвестиция курлавырын, социал-экономиктиг хөгжүлдениң тускай программазы-биле боттандырар төлевилелдерни таныштырар. Республиканың турисчи адырының комплекстиг тудугларының бөлүк саавырларын база санал-оналдарын делгээр.

Тыва делегация шуулганның ийиги хүнүнде, март 2-де, илеткээр. «Келир үеже инвестициялар. Тыва Республиканы хөгжүдериниң келир үеде угланыышкыннары» деп таныштырылгазынга «Туризм», «Тудуг» база «Тускай экономиктиг девискээр, үлетпүр база агроүлетпүр парктары» угланыышкыннарда төлевилелдерни тайылбырлаары планнаттынган.

«Туризм» угланыышкыны-биле Таңды кожууннуң Чагытай хөлге турисчи-дыштанылга комплекизин, Каа-Хем кожуунга турисчи-логистика төвүн тургузары, «Үш-Белдир» санаторлуг-курорт төвүн база «Чедер» «Чедер» курорт-дыштанылга комплекизинге аалчылар бажыңныг улуг тудугларны, ол ышкаш «Тайга» туризм комплекизинге аалчылар бажыңының төвүн тударын таныштырар.

«Тудуг» угланыышкынынга Кызыл кожуунда «Преображенский», «Радиостанция» база «Юбилейный» микрорайоннарны тудар планны көргүзер.

Тываның социал-экономиктиг хөгжүлде программазында тускай экономиктиг девискээрлерни тудар хемчеглерни база таныштырар: «АгроТува» агроүлетпүр парыгы, Кызыл хоорайның үлетпүр парыгы, «Хандагайты – Боршоо» күрүне кызыгаары таварар автомобиль эрттирилге пунктузунуң чоогунга хостуг чурумнуг девискээр тудар төлевилел бар.

Красноярскиниң экономиктиг шуулганының киржикчилеринге республикада боттандырып турар улуг инвестиция төлевилелдерин: Ак-Сугнуң чес-профир чыдында даг-болбаазырадылга комбинадын, Улуг-Хем хөмүр бассейниниң Межегей чыдынынга хөмүр тывыш комплекизин база Кара-Белдирниң алдын чыдынында алдын тывыштыг бүдүрүлге тудуун сонуургадыр.

Красноярскиниң экономиктиг шуулганы-2023 үезинде, Тываның эрге-чагыргазы база оларның коллегалары, күрүне албан черлериниң база коммерциялыг организацияларның төлээлери кады ажылдажылга база удур-дедир харылзаалар тударының дугайында элээн каш дугуржулгаларга аттарны салыр чадавас.