Тываның Хөй-ниити палатазының чаа чыыжы хуралын эрттирген

ТР-ниң Хөй-ниити палатазының чаарттынган чыыжының пленарлыг хуралы болуп эрткен. Хɵй-ниитижилер-биле Тываның Баштыңы Владислав Ховалыг болгаш Дээди Хуралдың Даргазы Кан-оол Даваа ужурашканнар.

Ажылында улуг дуржулгалыг, идепкейлиг хамааты туруштуг, тɵрээн республиказының хөгжүлдези дээш кызып чоруур Хөй-ниити палатазының кежигүннеринге Тываның идегели улуг дээрзин олар демдеглээн. Ылаңгыя бо 2024 чылда – Россияның Президентизиниң болгаш Дээди Хуралдың депутаттарының соңгулдалары болур чылда. Амгы үеде палата соңгулдаларның эки эртериниң магадылалдары болур хөй-ниитижи хайгааракчыларның өөредилгезин чорудуп турар.

Тускай шериг операция байдалында, дайынчы хөделиишкиннерниң киржикчилерин болгаш оларның өг-бүлелерин деткиириниң айтырыгларынга бүгү күштерниң демнежилгези херек үеде палатаның ажылы чугула ужур-уткалыг апарганын Дээди Хуралдың Даргазы демдеглээн.

– Хөй-ниити палатазы ниитилел биле эрге-чагырга аразында чугаада ажык шөл болуп, республиканың эң чидиг айтырыгларынга хамаарыштыр чурттакчыларның санал-оналдарын сайгарып чугаалажыр индир болу берген. Ынчангаш Хөй-ниити палатазынга, ооң быжыг туруштуг кежигүннеринге идегеливис улуг.

Хөй-ниити палатазының чаа составынга чон-биле харылзаалыг, Тывавыс дээш, ооң чурттакчылары дээш үре-түңнелдиг ажылдыг болурун күзедим – деп, Кан-оол Даваа чугаалааш, хɵй-ниитижилерге ажылчын чедиишкиннерни болгаш чон-биле быжыг харылзаалыг болурун күзээн.

Хөй-ниити палатазының 2023 чылдың декабрьда соңгуттурган бешки чыыжынче 24 хɵй-ниити кирип турарын сагындырып каалы – аныяктарның болгаш улуг салгалдың, ɵɵредилге, культура, кадык камгалал, шажын-чүдүлге, тудуг болгаш кɵдээ ажыл-агый адырларының, хөй-ниити организацияларның тɵлээлекчилери. Даргазынга дуржулгалыг башкы болгаш организакчы Алесия Бажина бадылаткан.