ТР-ниң Дээди Хуралдың өөредилге, культура, аныяктар политиказы болгаш спорт талазы-биле комитединиң даргазы Аяна Монгуш республиканың хууда уруглар садтарының эргелекчилери-биле ужурашкан.
Ужуражылга үезинде социал сайгарлыкчы адырында ажыл-чорудулга болгаш ында нарын айтырыглар дугайында чугаалашкан. Амгы үеде хууда 11 уруглар сады Кызыл хоорайда, Кызыл, Чөөн-Хемчик, Тожу болгаш Мөңгүн-Тайга кожууннарда бар. Ында чаштарны чүгле өөредир болгаш кижизидер эвес, а муниципалдыг садтарның ажылының чамдыызын боттарынче ап, чаа ажылчын олуттарны тургузуп, өг-бүлелерге таарымчалыг байдалды тургузуп турар.
Чарыгдалдарның орнун республиканың бюджединден тургузары, ажылдакчыларның шалыңын санаар аргалары, бөлүктерниң долдуртунуп турары дээн чижектиг чугула айтырыгларны база чугаалашкан. Хууда уруглар садтарының эргелекчилери бо айтырыгларны шиитпирлээрде күрүнениң дузазынче идегеп турарын дыңнаткан.
Парламентиниң комитет даргазы Аяна Монгуш Тыва Чазактың отчеду-биле таныштырар ажылчын үнүүшкүннер үезинде уруглар садтары-биле хандырылга айтырыглары база көдүртүнүп турганын чугаалаан. Ону барымдаалааш, байдалды тайылбырлаары болгаш дуза кадары-биле Өөредилге яамызынче дилегни депутат чоргускан. Чоннуң соңгуттурганы хууда уруглар садтарының удуртукчуларынга улаштыр кандыг ажыл чорударын база сүмелээн.
– Чаштарны школа назыны четпээн уругларның өөредилге албан черлеринге олуттар-биле хандырар дугайында Россияның Президентизиниң Чарлыын кым-даа өскертпээн. Хууда уруглар садтарының айыткан сорулганы чедип алырынга ужур-дузазы улуг, ынчангаш бо дилегни хыналдага алыр бис – деп Аяна Монгуш ужуражылганың түңнелинде демдеглээн.
