2023 чылда Россияның кеземче күүселдезиниң Тывада эргелели Тывада шииттирген кижиниң чурттаар материал-техниктиг байдалын экижидип, күш-ажылче оларны хаара тударының аргаларын калбартыр ажылдарны ам-даа уламчылаар.
Россияның кеземче күүселдезиниң Тывада эргелелиниң бүдүрүлгелериниң чаа участоктарын ажыдып, бүдүрүкчү күчүнү улгаттырары – планда. Эргелел боттарының бүдүргени экологтуг арыг, мал болгаш ногаа продукциязын республиканың иштики рыногунче үндүр садарын планнаан. Ынчангаш көдээ ажыл-агый шөлдерин улгаттырып, инек, хаван, куш кажааларын немей тудары көрдүнген.
Эргелелдиң көдээ ажыл-агый угланыышкынныг ажыл-чорудулгазы хөгжээн Россияның кеземче күүселдезиниң Тывада эргелелиниң дузалал ажыл-агыйлары бөгүнде 4200 ажыг баш мал-маганны тудуп, эрткен сезонда тарылга шөлдеринден 482 тонна картофельди, 50 хире тонна ногаа культураларын ажаап, 90 ажыг тонна тарааны ажаап, дээрбелээш, 790 тонна сиген-ширбиилди кезип алган.
Эргелелдиң начальнигиниң хүлээлгезин күүседип турар Олег Тодояков, 2022 чылда хоругдалда кижилерниң 40 ажыг хуузу ортумак болгаш тускай эртемнерни чедип алганын дыңнаткан. Төлевирлиг ажылдарда хаара туттунган шииттирген кижилерниң күш-ажыл бүдүрүлгези улгаткан.
Россияның кеземче күүселдезиниң Тывада эргелелиниң 1 дугаар эдип-чазаар колониязының баазазында Тываның эдип-чазаар албан черлеринге бүдүрген бараан садыы регионда бир дугаар ажыттынган.
Тус черниң чурттакчылары оон бедик шынарлыг барааннарны садып азы чагып, хереглээн чүүлдерин элээн чиик өртектер-биле садып ап болур. Эргелел республиканың шупту эдип-чазаар албан черлеринге ындыг садыгларны ажыдарын планнаан.
Бүдүрүлге албан чери-биле харылзажыр телефон дугаары: 94-551.
