ТР-ниң Көдээ ажыл-агый болгаш аъш-чем яамызы хой дүгүн болбаазырадыр болгаш садып-сайгарып турар ажыл-агыйларның чарыгдалдарынга субсидия бээри-биле документилерни хүлээп эгелээн.
Тываның Баштыңы Владислав Ховалыгның даалгазы-биле, 2025-2030 чылдарда Тыва Республикада өшкү болгаш хой ажыл-агыйларын хөгжүдериниң комплекстиг планы езугаар деткимче хемчеглерин боттандырып турар.
2022 чылдан эгелеп регионнуң көдээ ажыл-агый бүдүрүкчүлеринге деткимче хемчээ кылдыр хой дүгүн хүлээп алырын эгелээн. Дүктүң баштайгы болбаазырадылгазын чорудар инвестор – «Сергеихинский текстиль» АН-га дужааган дүктүң өртээнге субсидияны берип турар. Бүдүрүлге республиканың кожууннарында дүк чыыр пунктуларны организастап, Кызылдың үлетпүр парыгында бүдүрүлге цегиниң баазазында чиг эт-септи чуп, сорттап турар.
2022 чылдан 2024 чылга чедир бүдүрүлге ниитизи-биле чиг этти – 1300 тонна дүктү хүлээп алган. Бо чылын 532 тонна чиг этти чыыр планныг.
Бо чылдан эгелеп "Сергеихинский текстиль" АН 2022-2024 чылдарда чыып алган дүгүн чуурунче кирер. Бо чылдың июньдан бээр 19,5 тонна чиг этти чуп, ооң 48-60 хуузундан арыг удазынны алган.
Ажыл-агыйларның чамдык категориялары – хууда дузалал ажыл-агыйларының, тараачын-арат ажыл-агыйларының, хууда сайгарлыкчыларның дүк болбаазырадылгазынче үндүрген чарыгдалдарының чамдыызын эгидер акша-хөреңгини республика бюджединден тускайлаан болгаш, бир кил дүктү 30 рубль кылдыр санаан. Чылдың-на дүк бүдүрүкчүлерин деткииринче алды сая рубльди аңгылап турар.
Бо чылын субсидия алырынче хууда дузалал ажыл-агыйларның база тарачын-арат ажыл-агыйларның баштыңнары чагыгны киирип болур.
Улуг-Хем, Эрзин, Мөңгүн-Тайга, Тес-Хем, Чөөн-Хемчик, Өвүр кожууннарга база Кызыл хоорайга дүк хүлээр пунктулар ажылдаар. ТР-ниң Көдээ ажыл-агый болгаш аъш-чем яамызының ВКонтакте социал четкизинге дүк чыыр пунктуларның даңзызын, ооң адрестерин болгаш харылзажыр аргазын айтып салыр.
Субсидия алырынче чагыгны бөлүк документилери-биле "Промот бюджет" портал таварыштыр электроннуг хевирде чорудар. Республиканың Көдээ ажыл-агый болгаш аъш-чем яамызының арынында vk.com/wall-117799467_15842айтыгда чогуур документилерниң даңзызын парлаан.
Статистиктиг сан-чурагайдан алырга, бо чылдың июль 1-ге чедир Тыва Республикада 917 баш шээр мал бүрүткеттинген.