Коллегияның делгереңгей хуралы регионнуң социал адырларының хөгжүлдезин түңнеп, дараазында базымнарны тодарадырынга чугула шөл болган.
2025 чылда адырның ниити акшаландырыышкыны 6,5 млрд. рубль болган, ооң мурнунда чылга деңнээрге 16 хуу хөй. Ол Тываның чурттакчыларының дилээни чаа деткимче хемчеглерни кииреринге ол акшаландырыышкын арганы берген.
2025 чылда республиканың күш-ажыл рыногунда чогумчалыг хөгжүлде уламчылап, ажыл чок чоруктуң деңнели эвээжээн. Күш-ажыл рыногун экижидер «орук картазын» боттандырып, 1792 ажылчын олутту тургускан, планнаттынган көргүзүг 119 хуу күүсеткен.
Социал керээлер хамаатыларны деткиир чедимчелиг арга апарган. Эрткен чылын 3569 керээ чардынган, ооң-биле 1248 чурттакчы боттарының ажыл-агыйын ажыдып, сайгарлыкчы ажылын эгелээн.
Регионда тудуг ажылдары идепкейжээнинден, улуг инвестиция төлевилелдеринге кадрлар курлавырын тургускан. Ажылче хүлээген 230 ажылдакчының 200-ү – Тываның чурттакчылары болган.
Инвалид кижилерни ажылга хаара тударынче онза кичээнгейни угландырган, дилег киирген улустуң 61 хуузу ажылда тургустунган. Тускай шериг операциязының киржикчилери-биле база доктаамал ажыл чоруп турар: 1320 кижиниң 888-и ажылды тыпкан.
Социал хандырылга адырында планнаттынган көргүзүглер ажыр күүсеттинген. Улуг назылыг болгаш инвалид улустан 7718 кижи ачы-дузаны алган. «Чыргалдыг узун назын» фондунуң деткимчези-биле аъш-чем аймаан чедирип, бажың-балгат септээринге адрестиг ачы-дузаны көргүскен. Россия Федерациязының Президентизиниң чарлыктарын күүседири-биле, Тиилелгениң 80 чыл оюнда хоочуннарга социал магадылалдарны берген.
2025 чыл өг-бүле политиказын быжыглаар чыл апарган. «Өг-бүле» национал төлевилел езугаар база Тываның Баштыңы Владислав Ховалыгның даалгазы-биле деткимчениң чаа хемчеглерин киирген. Маадыр иелерге 500 муң рубльдиң чаңгыс катап бээр төлевирин доктааткан. «Чылдың өг-бүлези» мөөрейниң тиилекчилери 100 муң рубльди алыр, ол ышкаш «Өг-бүлениң ыдыктарын кадагалааны дээш» деп регионалдыг медальды алганнарга 50 муң рубль шаңналды тургускан.
Хөй ажы-төлдүг өг-бүлелерге чуртталга-коммунал ачы-дуза төлевириниң чарыгдалдарын эвээжеткен стандартты доктааткан – 22 хуу эвес, а 15 хуу кылдыр. 5-8 классчы 3 муң хире школачылар чемненген чарыгдалдарынга компенсацияны ап турар. Бир дугаар өпеязы төрүттүнген өг-бүлелерге «Тываның чаш төлүнге» деп белек комплектизин берип турар.
Тускай шериг операциязының киржикчилериниң өг-бүлелери деткимче доктаамал ап турар. Уруглар садында барып турар 2600 уругга ада-ие төлевиринден хостаан. «Социал хөмүр» төлевилелинче мөчээн, ис чок читкен, балыгланган дайынчыларның өг-бүлелерин база киирген.
2026 чылда яамы ол көргүзүглерни улам быжыглап, чурттакчы чоннуң амыдырал-чуртталгазының шынарын экижидеринче ажылдарны угландырар. Кадыкшылы кызыгаарлыг кижилерге чуртталга программаларын калбартыры, тус черниң чурттакчыларын ажылче хаара тудары-биле экономикада кадрлар хереглелин баш бурунгаар санаары, күш-ажыл хамаарылгаларын ажык-чарлыг болдурары база социал ачы-дузаның шынарын бедидери – кол айтырыглар болуп арткан.
