Тываның кадык камгалал албан черлеринде үндезин септелге ажылдары эгелээн. «Чаңгыс демниг Россия» партияның Улусчу программазынче кирип турар «Узун болгаш идепкейлиг назын» национал төлевилелдиң эгеки чаданы эде чаартыр программа езугаар республиканың кадык камгалалының инфратургузуун чаартыр улуг ажылдар чоруп турар.
Эрге-чагырга соңгукчуларның чагыгларын күүседири-биле кадык камгалал албан черлерин чаартып, дериг-херекселдер-биле четчелеп турар.
Амгы үеде Улуг-Хемниң кожууннар аразының эмнелге төвүнүң поликлиниказында болгаш Чеди-Хөлдүң төп кожуун эмнелгезиниң чыдып эмнедир салбырында бузар-чазар ажылдар чоруп турар. Ниитизи-биле 2026 чылда республикада беш эмнелге албан черлеринге улуг септелгелер, ол ышкаш Таңды кожууннуң Кызыл-Арыг суурда фельдшер-акушер пунктузунга модульдуг тудугну тудары планнаттынган.
Бай-Хаакта Таңдының төп кожуун эмнелгезиниң чыдар салбырында, Тес-Хемниң төп кожуун эмнелгезиниң поликлиниказынга база Барыын-Хемчиктиң кожууннар аразының эмнелге төвүнүң халдавырлыг аарыглар салбырында улуг септелге ажылдарын кылырынга мөөрейни доозуп, тиилекчилер-биле керээлерни чарып эгелээн.
«Албан черлерин тударындан аңгыда, септеп чаартып база турар бис. Республиканың чурттакчылары шынарлыг эмчи дузазын үе шаанда алыр кылдыр байдалдарны тургузарын кызыдып турар бис. Чаартынган дериг-херексел, чаа фельдшер-акушер пунктулары болгаш амбулаториялар, албан чериниң автопарыгы – бо бүгү бистиң чонувустуң кадыкшылын экижидер дээш ажылдап турар. А эмчилеривистиң болгаш эмчи ажылдакчыларының бедик мергежили болгаш ажылынга бердингени бо чаа аргаларны бүрүнү-биле ажыктыг ажыглаар арганы берип турар» – деп, Тываның Баштыңы Владислав Ховалыг демдеглээн.
2021 чылдан эгелеп «Кадык камгалалы» национал төлевилел езугаар кадык камгалалының эгеки чадазын эде чаартылга программазы боттанып эгелээнин сагындыраал.
Сөөлгү беш чылда Тывада 34 фельдшер-акушер пунктузун болгаш 12 эмнелге амбулаториязын туткан, 21 эмнелге черинге улуг септелгелерни чоруткан. Чүгле эрткен чылын 10 фельдшер-акушер пунктузун, ийи амбулаторияны туткан, эгеки чаданың беш объектизин чаарткан, амгы үениң дериг-херекселдерин болгаш автомобильдерни садып алган. Ооң-биле чергелештир тус черниң эмчилериниң практиказынче бедик технологиялыг чаа эмнээшкин аргаларын киирген. Ынчалдыр тыва тускай мергежилдиглер баш мээзинге нарын кезиишкиннерни кылып, ыжыктар эмнээриниң мурнакчы аргаларын ажыглап турар.
Россияда 2026 чылда «Узун болгаш идепкейлиг назын» чаа национал төлевилел-биле кадык камгалалының эгеки чадазын эде чаартыр программаның ийиги чадазы эгелээн. 2030 чылга чедир уламчылаар программа эмнелге албан черлериниң материал-техниктиг баазазын чаартып, чаа объектилерни тудуп, эмнелгелерни амгы үениң дериг-херекселдери-биле хандырар. Чижээ, Тывага модульдуг 14 тудугну тудар, кадык камгалалының 20 объектизинге улуг септелге ажылдарын кылыр. «Тываның кадык камгалал системазын улам чедингир, таарымчалыг болгаш чедимчелиг болдурар дээш бүгү күжениишкиннерни үндүрер бис» – деп, Владислав Ховалыг демдеглээн.
