Тываның Баштыңы Владислав Ховалыг аппарат хуралынга малдың хүр-менди кыштагладыры чугула дээрзин демдеглеп, Көдээ ажыл-агый болгаш аъш-чем яамызы база тус чер чагыргалары-биле кады кыштаглаашкынның таарымчалыг байдалын хандырарны чедип ап, ол бүгү хемчеглерни организастаарын оралакчызы Уран-оол Ондарга дааскан.
Малдың күш-шыдалын, чем хандырылгазын, харның кылынын көөрү-биле малчын турлагларынче доктаамал үнери – кол ажыл. Ылаңгыя чедери берге аалдарже оруктарны дырттарынче кичээнгейни салыр.
ТР-ниң Көдээ ажыл-агый болгаш аъш-чем яамызының дыңнатканы-биле алырга, республикада үнүүшкүннерни организастаан. Ында кожууннарның көдээ ажыл-агый эргелелдериниң тускай мергежилдиглери, Республиканың ветеринария төвүнүң мал эмчилери, көдээ суурларда фельдшер-акушер пунктуларының эмчилери киржип турар. Олар малчыннарга эргежок чугула эмчи дузазын көргүзүп, мал-маганга ветеринарлыг хемчеглерни чорудуп турар.
Үнүүшкүннер үезинде тускай мергежилдиглер автооруктарга мал-маган-биле болган озал-ондактарга хостуг салган малдар буруулуг дээрзин дыңнадып, тайылбыр ажылын чорудуп турар. Ол ышкаш бо хемчег мал-маганны бөрүлер халдаашкыннарындан камгалаарынче база мал оорун болдурбазынче угланган. Федералдыг болгаш республика автооруктарын дургаар турар 392 малчын турлаг чырып турар кожааларны ажыглап турар.
Бөгүнге чедир республикада 300 муң ажыг баш мал кыштаглаашкынче кирген, 224 муң тонна сиген-ширбиил курлавырлаттынган. Амгы үеде 218,000 тонна мал чеми бар.
Дириг амытаннар камгалаар күрүне комитединиң инспекторларының ажылын демдеглезе чогуур. Олар бөрүлерниң аай-дедир шимчээшкинин хайгаарап, малчын аалдарже чоокшулап келгенин демдеглеп турарлар. Эрткен неделяда Кызыл биле Чөөн-Хемчик кожууннарга араатан аңнарның халдаашкыны бүрүткеттинген. Чөөн-Хемчикте байдалды дуржулгалыг аңныыр инспекторлары хайгааралда алган. Сөөлгү айда республикада ниитизи-биле 69 бөрүнү аглаан.
«Бөрүлерниң халдаашкыннарынга таварышкан малчыннар тус черниң инспектору-биле дарый харылзажырын азы Тываның аңныыр хайгааралының талазы-биле күрүне комитединиң 8 (39422) 5 61 60 дугаарлыг телефонунче долгаарын сүмелээр-дир бис. Ол ышкаш албан чериниң албан езузунуң сайтызы таварыштыр медээни чорудуп болур» – деп, комитет дыңнаткан.