Тускай шериг операциязының хоочуннарын деткииринче база өөредиринче угланган республикада «Тываның маадырлары» кадрлар программазы боттанып турар.
Тываның күрүне университединде «Күрүне болгаш муниципалдыг удуртулга» программа-биле төлевилелдиң 30 киржикчизи мергежилин бедидер өөредилгени эртип турар. Ол дөрт модульдан тургустунган онзагай курсту Президент академиязының күрүне удуртуп-башкарылгазының дээди школазының эксперттери-биле кады ажылдап кылган.
Киржикчилер амгы үеде өөредилге курузунуң экономика база саң-хөө дугайында ийиги модулюн чедиишкинниг дооскан. Ам олар модульдар аразының өөредилгезин боттары шиңгээдиринче кирген. Бо үе-чадада эрге-чагырга органнарынга стажировка үезинде дагдыныкчылары-биле кады ажылдап, хууда-профессионал шинчилелдерниң түңнелдерге даянып хууда консультацияларны ап, электроннуг курстарны эртер. Курстар үезинде Россияның бюджет болгаш үндүрүг системазының, күрүне болгаш муниципалдыг саң-хөө, ол ышкаш күүсекчи эрге-чагырга органнар системазында күрүне садыглаашкыны болгаш төлевилел удуртулгазы деп темаларны шиңгээдир.
Ол ышкаш программаның киржикчилери кожа-хелбээ регионнарже культурлуг экспедицияже үнүп, тус черлерниң культуразы болгаш ужур-чаңчылдары-биле таныжарлар. Хоочуннар оон аңгыда алган билиглерин практика кырында ажыглаарынга доозукчунуң диплом ажылын бижип эгелээн.
«Маадырлар үези» президент программазы-биле дөмейлешкек «Тываның маадырлары» программа Ада-чурт камгалакчызының чылында база Улуг Тиилелгениң 80 чылында эгелээнин сагындыраал.
Тываның Баштыңы Владислав Ховалыгның эгелээни регионалдыг төлевилел дайынчылар ортузунда улуг үнелелди алган. Аңаа киржир кылдыр 600 кижи билдириишкинни киирген. Олар айтырыгларга чедиишкинниг харыылап, республиканың сайзыралын канчаар көрүп турарының дугайында эссени бижип, төлевилелдиң эсперттери-биле хууда чугааны кылганнар.