«Тываның маадырлары» кадрлар программазының төнчү чадазының киржикчилеринде өөредилгениң дөрткү, азы төнчү кезээниң сөөлгү хүннери чымыштыг чоруп турар.
Доозукчулар Россияның улус ажыл-агый болгаш күрүне албаны академияның удуртулга дээди школазының база Тываның күрүне университединиң арга-дуржулгалыг башкыларының удуртулгазы-биле, удуртуп-башкарылга системазынга ажылдаарының практиктиг арга-дуржулгазын шиңгээдип, боттарының доозукчу ажылдарын белеткеп турарлар. Олар эртем удуртукчуларының хайгараалы-биле Тывага ажыглаар боттуг башкарылга шиитпирлерин шылгалда ажылдарынга шинчилээннер.
Түңнел сессияның программазы киржикчилерниң хууда сайзыралынче болгаш команданы тургузарынче угланган. Ынчангаш оларның доозарының түңнел ажылдарын шынарлыг ажылдап белеткээринге болгаш оларны чедиишкинниг камгалаарынга дузалыг лекциялар болгаш практиктиг кичээлдерни киирген.
«Дайынчы үженниң» эртени Тываның алдар-аттыг спортчулар-биле сула шимчээшкиннерден эгелээр. Оолдар сагыш-сеткилин база мага-бодун сергедип алгаш, яамылар болгаш албан черлерден башкылары болгаш эксперттери-биле кичээлдеп кириптер. Чижээ, Кызыл мэриязының болгаш ТР-ниң Юстиция яамызының кадрлар албанының төлээлери Наталья Доржу биле Ольга Чамзо күрүне болгаш муниципалдыг албанда кадр ажылының нарын чүүлдери-биле таныштырган.
Төлевилел мастерскаязы хевирге эрткен доозукчунуң шылгалда ажылдарын баш бурунгаар камгалаары – неделяның кол болуушкуну болган. Киржикчилер боттарының шинчилелдерин болгаш ажылының түңнелдерин комиссияга таныштырган. Доозукчуларының ажылдарын эртем удуртукчулары база хынап, үнелээн. Оларның шинчилели республиканың хөгжүлдезинче угланган төлевилелдерниң чүгле теоретиктиг үндезиннерин эвес, а практиктиг ажыглалын база үнелээр арганы берген.
Культура болгаш уран чүүл билиглери кирген «Гуманитарлыг орук» кичээлдеринден дыңнакчылар чаа идеяларга сорук киирер болгаш оларны амыдыралга боттандырар күштү алган. Чижээлээрге, «Саяннар» театрның уран чүүл удуртукчузу Аяна Монгуш-биле хорга ырлаар мастер-классты дыңнакчылар сонуургаан. Камгалакчылар боттары база ырыларны күүсеткеннер.
«Тываның маадырлары» программаның бирги доозукчулары бо неделяда доозарының диплом ажылдарын камгалаар.
Медээни болгаш чурукту ТР-ниң Чазааның парлалга албанындан алган