Июнь 8-тен эгелеп, «Тываның маадырлары» регионалдыг кадрлар программазының төнчү кезээниң тиилекчилери эң сөөлгү дөрткү өөредилге модулюн эгелээр, ол үеде Тываның күрүне университединиң болгаш Россияның улус ажыл-агый болгаш күрүне албан академиязының күрүне эргелеп-башкарылгазының дээди школазының башкыларының удуртулгазы-биле амгы үениң удуртуп-башкарылга арга-хевирлерин өөрениринче кирер. Өөредилгениң төнчүзүнде доозукчунуң тускай квалификация ажылын бижип, ону камгалаар.
Программаның киржикчилери өөренип турар он хонуунуң дургузунда бодунуң сайзыралынче болгаш команда тургузарынче угланган ханы өөредилге курузун эртер. Ол ышкаш профессионалдыг арга-мергежилин хевирлээр тренингилерни эртип, культура-чырыдыышкынныг болгаш чогаадыкчы хемчеглерге киржир. Олар курсту дооскаш, түңнел шылгалдаларны, айтырыг-харыыларны дужаап, элээн каш хемчеглерге кады киржир.
Тываның спорт сайыдының хүлээлгезин күүседип турар, Россияның алдарлыг тренери Владимир Түлүштүң удуртулгазы-биле программа киржикчилериниң эртенги шимчээшкиннеринден өөредилге хүнү эгелээр. Дүрген каньонунче экскурсия дээн ышкаш, психологтуг терапияны бойдусче үнүүшкүннер-биле чорудары көрдүнген.
Тываның күрүне университединиң экономика факультединиң деканы, программаныыың удуртукчузу Чодура Манчык-Сат баштаан башкылар лекцияларны номчуур. Россияның улус ажыл-агый болгаш күрүне албан академиязының күрүне эргелеп-башкарылгазының дээди школазының башкылары база элээн каш курстарны эрттирер. Чижээ, Президент Академиязының Күрүне эргелеп-башкарылгазының дээди школазының эксперти Станислав Демидов «Удуртуп-башкарылга шиитпирлерин ажылдып кылыры болгаш хүлээп алыры», «Чөрүлдээлерни таарыштырары», «Тергиидекчи чорук» деп темаларга элээн каш тректерни таныштырар.
«Тываның маадырлары» программаның дыңнакчылары күрүне эргелеп-башкарылгазынга сан-чурагайлыг технологияларны ажыглаарының үндезиннеринге бөлүк кичээлдерни алыр.
Дыңнакчылар Президентиниң академиязының Күрүне эргелеп-башкарылгазының дээди школазының “Күрүне эргелеп-башкарылгазының сан-чурагай школазы” төптүң кылымал угаан талазы-биле эксперти Артем Чаленконуң удуртулгазы-биле информация айыыл чок чоруунуң үндезиннерин болгаш күрүне эргелеп-башкарылгазынга кылымал угаан технологияларын ажыглаарының аргаларын шиңгээдип алыр. ТР-ниң сан-чурагай хөгжүлдезиниң сайыды Эдуард Ховалыг дыңнакчыларга Тыва Республикада сан-чурагай хөгжүлдезин болгаш ооң келир үезин таныштырар.
Оон ыңай, өөредилге үезинде ниити ыры, бал танцызы, хөйнүң мурнунга сөс алыры, тускай сорулгалыг аудитория-биле харылзааны тургузары дээш, оон-даа өске мастер-класстарны киирген.
Программа киржикчилери өөрениринден аңгыда, чаңгыс команданың хей-аъдын тургузары-биле, тураскаалдыг хүннерге тураскааткан хоорайның культура-чырыдыышкынныг, массалыг хемчеглеринге киржир. Россия хүнүнге база Өг-бүле хүнүнге тураскааткан хемчеглерге аалчылар болуп киржир, оон аңгыда Кызылга гастрольдап келир Москваның уран чүүлдүң академиктиг театрының шиизин көөрлер.
«Сессия эгезинде аңгы-аңгы организацияларга, яамыларга болгаш албан черлеринге эрттирген стажировказының түңнелдерин киржикчилер-биле сайгарар бис. Доозарының түңнел шылгалда ажылдарын бижииринге херек материалдарны чыырынче кол кичээнгейни углаан, ынчангаш практикадан алган бодалдарын үлежири солун болур. Курстуң төнчүзүнде бүгү дагныкчы ажылдың түңнелдерин байырлыг байдалга түңнээри – бүдүн программаның төнгениниң чараш кезээ апаар» – деп, программаның куратору, Тыва Республиканың Чазак Администрациязының күрүне албаны болгаш кадрлар политиказы департаментиниң начальнигиниң оралакчызы Алдынай Монгуш чугаалаан.
