Тываның Баштыңы Владислав Ховалыгның даалгазын күүседири-биле, тускай шериг оепрациязының киржикчилериниң хууда болгаш профессионал сайзыралынче, ол ышкаш оларның удуртур-баштаар ажылдарже шиличииринге деткимче көргүзеринче угланган республикада «Тываның маадырлары» регионалдыг программаны боттандырары уламчылап турар.
«Ам бо хүнде боттуг үре-түңнелдерни көрүп тур бис. Ол ажылдың практиктиг түңнелдери: Ол программаның беш киржикчизи республиканың эрге-чагырга органнарында чаа албан-дужаалдарда чедиишкинниг тургустунган. Программа үре-түңнелдиин бадыткап, бистиң маадырларывыска депшип өзер аргаларын берген чугула базым болган» – деп, Тываның Чазааның иштики политика талазы-биле департаментизиниң начальниги Артына Бузур-оол демдеглээн.
Эрткен чылдың декабрьда бот-өөредилгениң бир чадазы доосту бээрге, программаның шупту киржикчилери демдек алыр кезээн чедиишкинниг эрткен.
Дыңнакчыларга өөредилге канчаар эрткенин билип алыры-биле, айтырыгларга харыылаар анкетаны долдуртканын демдеглезе чогуур. Ооң түңнелдери өөредилге программазы эки болганын көргүскен. Кичээлдер эптиг байдалдарда эртип, ажыктыг чүүлдер хөй, арга-дуржулгалыг эксперттер-биле кады ажылдаар аргалыг болганын хөй кезии айыткан.
Амгы үеде программа киржикчилери дагдынычылары-биле кады стажировканың ийиги кезээн эртип турар, ол бо чылдың март 6-га чедир уламчылаар. Киржикчилер доктааттынган негелде езугаар практиктиг арга-дуржулганы шиңгээдип, алган билиглерин хөгжүдер кылдыр стажировка планнарын бадылаан.
Ооң-биле чергелештир программа доозукчулдарының түңнел шылгалда ажылдарының темаларын тургузуп турар. Олар диплом ажылдарынга республиканың социал-экономиктиг хөгжүлдезинге хамаарышкан айтырыгларны шинчилээр болгаш сайгарар.
«Дагдыныкчы ажыл дээш харыысалгалыг удуртукчулар программа киржикчилери-биле доктаамал харылзааны тудуп, бедик шынарлыг белеткелди база ачы-дузаларны алзын дээш ажылдап турар» – деп, Артына Бузур-оол немээн.
