2026 чылдың баштайгы чеди айларында Тываның медицина албан черлери 129 санныг нарын диагностика дериг-херекселинге (магнит-резонанстыг томография, компьютерлиг томография, флюорография, маммография, рентгенография болгаш ангиография аппараттары) 323 муң ажыг шинчилгени чоруткан.
Амгы үениң диагностика техниказы эмчилерге аарыгларны дүрген илередип, диагнозту бадыткап, аарыг кижилерни эмнээр аргаларны шилип алырынга дузалаар.
Компьютерлиг томография шинчилгелери элээн көвүдээни демдеглеттинген. Чыл эгезинден бээр республикада 44 муң ажыг КТ-шинчилгени кылган, 2025 чылдың ол үезинде 28 муң турган. Чаа клиниктиг арга-сүмелерни кииргени-биле диагностиктиг шинчилгелер саны өскен.
Ооң-биле чергелештир Тываның диагностика баазазын чаартыр ажылдар уламчылавышаан. «Узун болгаш идепкейлиг назын» национал төлевилел база Улусчу программа боттандырылгазы-биле чаа эмнелге дериг-херекселдерин садып ап турар. Амгы үениң техниказы эргижирээн дериг-херекселдерни чоорту солуп, эмчи шинчилгезиниң чедингирин болгаш шынарын бедидер арганы берген.
Республиканың найысылалындан дашкаар эмнелге инфрастургузуун хөгжүдери чугула угланыышкын болуп хевээр арткан. Тывада бөгүнде бар 129 нарын дериг-херекселдиң 69-у, азы чартыындан хөйүн кожууннар ажыглап турар.
«Чүгле Кызылдың эвес, а республиканың шупту муниципалдыг тургузугларының чурттакчылары амгы үениң диагностика аппараттарынга шинчидип алыр арганы хандырар херек. Кожууннарда диагностика баазазын хөгжүдери – чурттакчы чонга эмчи дузазының ыраан кызырып, чогуур шинчилелдерни эртип алырынга таарымчалыг байдалдарын тургузар» – деп, Тываның Кадык камгалал яамызы демдеглээн.
Тывада эмчи дузазының шынарын болгаш чедингирин бедидер дээн системалыг ажыл-биле дериг-херекселдерни чаартып, диагностика шинчилгелерин хөгжүдерин ам-даа уламчылаар.