Тываның музейлери федералдыг деткимчени алыр

Бо чылын Тываның муниципалдыг музейлери «Культура» национал төлевилелдиң чорудуу-биле беш сая рубль түңнүг федералдыг деткимчени алыр.

Федералдыг музейлер даңзызынче Тываның Алдан-Маадыр аттыг Национал музейиниң төөгү болгаш чурт шинчилел салбыры болгаш Кужугет Серээевич биле Александра Яковлевна Шойгуларның бажың-музейи кирген.

«Культура» национал төлевилелче 2021 чылда муниципалдыг музейлерниң дерилгезиниң талазы-биле чаа угланыышкынны киирген. Бо чылын 171 музейниң техниктиг дерилгезинче 750 сая рубльди чарыгдаары планнаттынган. Делгелге-экспозиция ажыл чорудулгазынга ажыглаар техника, экспонаттар кадагалаар дериг-херекселдерден аңгыда музейлерниң видеохайгаарал системазын база чаартыр.

Келир чылын Тываның Алдан-Маадыр аттыг Национал музейиниң техниктиг дерилгезин федералдыг бюджеттен 15 сая ажыг рубльди аңгылаар.