Тыва үндезин культура төвүнүң ажылдакчылары үндезин тыва арга-биле даараан хептерни сайзырадыр сорулга-биле Тываның Начын мөгези Кайгал-оол Донгакка тыва бөрттү, тонну, идикти белекке бергеннер.
Тываның “алдын холдуг” ус-шеверлери, тыва тон даараар ус-шевер Клара Донгак, тыва идик даараарынга тергиин ус-шеверлер Урян-Хай, Сайзанак Сарыгларлар база тыва бөрт даараар ус-шевер Омак Оюн идик-хепти даарааннар.
Ус-шеверлерниң холдары-биле даараан хептерни республикавыстың база бир ховар мөгези, Кайгал-оол Донгак улуг өөрүшкү-биле хүлээп алган. Ол Тыва үндезин культура төвүнүң төлевилелдеринге идепкейлии-биле киржип, үндезин культураның сайзыралынга улуг үлүг хууну киирип чоруур кижилерниң бирээзи.
Тоол шагдан тура мөге кижиниң овур-хевири чон аразынга үлегер-чижек болуп келген. Ооң иштики делегейиниң онзагайы, кижизиг мөзү-бүдүжү өзүп орар аныяк салгалдарга улуг салдарны чедирип, кижизидилге талазында кол черни ээлеп турар. Аныяк-өскен бодунуң ынак мөгезиниң овур-хевирин, чон мурнунда алдынып чоруурун өттүнүп, оон үлегер-чижек алырын кызыдарлар.
Тыва үндезин культура төвү өгбелеривистиң арттырып каан чаагай чаңчылдарын улуг хүндүткел-биле сагып, тыва идик хевивисти үнелеп, өзүп орар аныяк-өскенивис мурнунга үлегер-чижек болурунче кыйгырган.
