Бөгүн күрүне байырлалы – Тыва Республиканың Үндезин хоойлу хүнү. Ону бадылаандан бээр 25 чыл эрткен.
Республиканың школачылары Тываның кол документизиниң 25 чыл оюнга тураскааткан онлайн викторинага киришкенин республиканың немелде өөредилге сайзырадыр төвү дыңнаткан.
Онлайн викторинаның эрттирикчилери – «Консультант Тува» кызыгаарлаан харыысалгалыг ниитилел база Тываның гуманитарлыг болгаш тускай социал-экономиктиг шинчилелдер институду.
Үстүкү классчыларга викторина чүгле билиин хынаар эвес, а езулуг-ла Тыва Республиканың Үндезин хоойлузун сайгарып билирин көргүзер арга болган. Ол ышкаш школачылар регионнуң хөй янзы чурттакчыларының ниити байырлалынга киржип, өртектиг белектерни алган.
Россия Федерациязының Конституциязынга дүүшкек Тыва Республиканың Үндезин хоойлузу регионга турум ниитилел-политиктиг байдалдың, кижилерниң эрге-ажыктарының, төлээлекчи болгаш күүседикчи эрге-чагыргаларының чогумчалыг ажылының магадылалы болуп турар.