Бөгүн Москвада «Кызыл шөл» деп XII ном фестивалы эгелээнин Ю. Ш. Кюнзегеш аттыг Тываның ном үндүрер чери дыңнаткан. Аңаа бүдүн чурттуң 400 ажыг ном үндүрүкчүзү 150 000 хире аттыг номну делгеп, садып-сайгарар.
Чурттуң төвүнде Кызыл шөлге Тываның ном үндүрер чериниң номнарын сес дугаар майгындан сонуургап болур.
Фестиваль 16 шөлчүгешке эртер, чогаалга ынактарны болгаш аалчыларны чүс-чүс болуушкуннар манап турар: ынак чогаалчылары болгаш шүлүкчүлери-биле, ол ышкаш чурукчулар болгаш чуруттунган төөгүлерниң авторлары-биле ужуражылгалар, билдингир артистерниң болгаш хөгжүмчүлерниң көргүзүглери, чурттуң музейлериниң программалары-биле таныжылгалар, эртемденнерниң лекциялары дээш оон-даа өске хемчеглер.
Ажылдаар шагы: 10.00 шактан 22.00 шакка чедир, 8 дугаар майгын. Фестиваль июнь 4-тен 7-ге чедир уламчылаар, кирери хостуг.