Тываның улустуң чогаалчызы Александр Даржайның улустуң бурун тоолунга үндезилээш, шүлүктеп бижээни «Үгү» деп шиизин күрүнениң ойнаар-кыстар театры тыва дылга тургузуп эгелей бергенин Национал школа хөгжүдер институт дыңнаткан.
«Шииниң концепциязын бо чылдың август айда Тываның улустуң чурукчузу Начын Шалык-биле тодарадып алгаш, ажылдап кирипкен бис. Ооң онзагайы – шииниң маадырлары болур янзы-бүрү кушкаштарны коңгулуур-ойнаар-кыстар дузазы-биле ойнап диргизер деп шиитпирлеп алганывыста. Ук коңгулуур-куклаларның чидиг болгаш ыяңгылыг үннери хөгжүм шимелдезин күүседип, арга-эзимниң аян-шынарын илередир» – деп, чаа шииниң тургузукчу режиссеру Светлана Ондар тайылбырлап турар.
Шииниң уран-чечен делегейинде чаяакчы болгаш үрегдекчи ийи күштүң деңзигүүрү үрелип, чая бастына бергенинден камгалакчы күштүң чөрүлдээни шиитпирлээр дээш киржи бээринден солун төөгү эгелээр. Шиини жанр талазы-биле притча деп тургузукчу режиссёр тодарадып турар.
Чогаалды сценага тургузуп турар бөлүкте тыва культураның болгаш уран чүүлдүң билдингир ажылдакчылары Светлана Ондар (режиссеру), Начын Шалык (чурукчузу), Сергей Бадыраа (композитору), Эдуард Ондар (пластиктиг шимчээшкиннер) кирип турар. «Үгүнү» алды хардан өрү чаштарга, өөреникчилерге, сургуулдарга болгаш өг-бүлелерге көөрүн театр сүмелеп турар.
Тыва дылда чаа шиини шылгараңгай улуг чогаалчы, тыва дылдың, культураның суртаалчызы Александр Даржайның чырык адынга тураскаал кылдыр белеткеп турарын ойнаар-кыстар театрының директору Станислав Ириль дыңнаткан.
Чаа шииниң чонга баштайгы көрүлдези чаа чылда январь айның ийиги чартыында планнаттынган.