Тываның он бир кожуунунга өртке удур онза чурумну киирген

Россияның Онза байдалдар яамызының Тывада Кол эргелелиның дыңнатканы-биле, эрткен неделяда Улуг-Хем, Чөөн-Хемчик, Каа-Хем, Кызыл болгаш Тожу кожуннарның девискээринге сес хову өрттү бүрүткеттинген. Ол ышкаш Каа-Хем биле Тожу кожууннарда ийи арга-арыг өрттери хыпкан. Ол өрттерниң болуп турарынга кол нургулайында кижилер буруулуг. Өртке удур айыыл чок чоруктуң дүрүмнерин хажытканы дээш он үш хамаатыны административтиг торгаалга онааган.

Онза чурум чарлаан үеде кайы хамаанчок бок-сак, кургаг оът-сиген өрттедир, одаг кыпсыры хоруглуг. Өртке удур айыыл чок чоруктуң дүрүмнерин хажытканы дээш административтиг торгаалды онаары көрдүнгенин Онза байдалдар яамызы дыңнадып турар.

Өртке удур онза чурум дээрге, эрге-чагырганың күрүне органнарының азы тус черде бот-башкарылга органнарының доктаадып тургусканы өртке удур немелде негелделер-дир. Ооң үезинде хамаатыларга арга-арыг кирери, ажык от-биле ажылдар чорудары, одаглар кыпсыры, дачалар ниитилелдеринге, садчыларның болгаш огородчуларның эштежилгелеринге, бажың-балгат чанынга кургаг сиген, бок өрттедири хоруглуг.

Онза чурум үезинде бо негелделерни күүсетпээни дээш, хамаатыларны ийи муңдан дөрт муң рубль чедир, албан-дужаалдыг кижилерни 15 муңдан 30 муңга чедир, юридиктиг эрге-байдалдыг хамаатыларны 400000 рубльге чедир торгаалга онаап болур.