Тываның эрге-чагыргазы кышкы ажылдарга белеткенир кылдыр республиканың орукчуларынга чаа тускай техниканы дамчыткан. Мөңгүн-Тайгаже чоруткан грейдер каяа-даа торулбас күштүү база мурнунда чайлады идер тускай херексели-биле өскелерден ылгалдыг.
ТР-ниңң орук-транспорт комплекизиниң сайыды Шораан Чыргал-оол Мөңгүн-Тайга, Барыын-Хемчик кожууннарның орук организацияларының база «Тываавтотранс» бүдүрүлгениң төлээлеринге беш автомашинаның дүлгүүрлерин тывыскан.
Бо чылын 14 тускайжыттынган автомашинаны лизинг-биле садып алганын сайыт дыңнаткан. Республикада чедип келген баштайгы беш техниканы тус черлерде ажылын эгелээр кылдыр дораан дамчыдар деп яамы шиитпирлээн.
Хөй ажыглалдыг аар чүък техниказы кыжын оруктарны үстүрүп, чайын тудуг болгаш септелге ажылдарынга ажыглаарынга эптиг. Республиканың орук организацияларының парыгын чаартырынче 190 ажыг сая рубльди үндүрген.
Тываның Баштыңы Владислав Ховалыгның даалгазы езугаар регионда орук техниказын чаартыр ажылдар план-биле чоруп турарын Шораан Чыргал-оол демдеглээн. «Техниканы орук септелгезинге база ажыглаар апаар, ындыг болзажок оруктарның байдалының талазы-биле ажыл – биске эң чугула» – деп, ол айыткан.
Орукчулар улуг дуза-деткимчези дээш Тываның Баштыңынга база Чазаанга четтиргенин илередип, кыш чеже-даа харлыг болур болза, чаа транспорт орук ажылдарының шынарын экижидеринге идигни бээрин чугаалаан.
