Тыва Республиканың школалар, уруглар садтары болгаш өске-даа өөредилге черлери штаттан дашкаар болгаш онза байдалдар үезинде, чепсектиг база ужудукчу чок аппараттар ажыглап халдаашкын болганда канчаар хөделиринче угланган бүгү-российжи өөредилгелерге киришкен.
Өөредилгелер Россияның Чырыдыышкын яамызының бадылааны план езугаар эрткен. Тускай угланыышкынныг албаннар – Россияның Онза байдалдар яамызының, Россияның Иштики херектер яамызының, Росгвардия, Россияның Айыыл чок чорук албанының Тывада эргелели база Тыва Республикада террорга удур комиссия аппарадының төлээлерин хемчегче хаара туткан.
Башкылар болгаш удуртулга ажылдакчыларын, өөреникчилер (кижизиттирикчилер) камгалаар объектилерниң, ол ышкаш янзы-бүрү байдалдарда демниг хөделиринге оперативтиг албан черлериниң беленин хынаары база ниити айыыл чок байдалдың деңнелин бедидери – кол сорулга болган.
«Бистиң эң-не кол мурнады көөр угланыышкынывыс – уругларның айыыл чок чоруу. Эрткен өөредилге онза байдалдар үезинде өөредилге организацияларының белеткели бедик дээрзин көргүскен. Ада-ие бүрүзү бодунуң төлү дээш дүүревезин дээш, школаларның болгаш уруглар садтарының айыыл чок чоруун хандырар системалыг ажылдарны ам-даа чорудар бис» – деп, ТР-ниң өөредилге сайыдының хүлээлгезин күүседип турар Орлан Соян демлеглээн.
Регион девискээринде 484 өөредилге черинден 419 объект хемчегге киришкен. Баш бурунгаар медээден алырга, өөредилгелерге:
- өөредилге организацияларның 399 удуртукчузу,
- 7 муң ажыг башкы,
- 399 камгалал чериниң ажылдакчызы,
- өөренип турар 71 муң ажыг кижи киришкен.
27 муң кижизиттирикчи өөренип турар школа назы четпээн өөредилге организацияларынче база школалар чанында школа назы четпээн уруглар бөлүктеринче онза кичээнгей салдынган.
Белеткелдер үезинде ажылдакчылар, өөреникчилер база кижизиттирикчилер дүрген болгаш организастыг өскээр көжериниң арга-мергежилдерин быжыглап, штаттан дашкаар байдалдарда хөделириниң чурумун шиңгээдип, онза байдалдарга ниитизи-биле белен болурун катаптаан.