Тываның Экономиктиг хөгжүлде болгаш үлетпүр яамызы биле республиканың сайгарлыкчылары Донецк база Луганск улус республикалардан шыдажыр аргажок амыдыралдан дезип келген кижилерге ачы-буян дузаламчызын чыыр ажылды организастаан.
Организацияларның база хөй-ниити шимчээшкиннериниң баазаларынга дузаламчы чыыр пунктуларны ажыткан. Чыгдынган гуманитарлыг дузаламчыны, Донецк база Луганск улус республикалардан хамаатыларны түр када чурттадыр черлерже база ачы-буян дузаламчызын чыыр пунктуларынче хуваап чорудар кылдыр, «Кады бис» #МЫВМЕСТЕ регион штавынга хүлээткен.
Энерел сеткилдиг сайгарлыкчылар элээн каш тонна үр үеде үрелбес аъш-чем аймаан, чук саваларны, чаш уругларга херек барааннарны, чунар база орун-дөжек херекселдерин, хуу арыг-силигге ажыглаар чүүлдерни, канцеляр барааннарын чыгган. Ч.Р. Доржу, Д.В. Хертек, О.Н. Жамцтың хууда бүдүрүлгелери база «Фьюжн» кафе буянныг үүле-херекче бир дугаарында каттышкан.
Тывага чыгган гуманитарлыг дузаламчыны Крым Республикада Армянск хоорайга чедирер. Бо чылдың март эгезинде республиканың чурттакчылары дузаламчының бирги чүъгүн Донбассче чоруткан.
Кызылда Ленин кудумчузунда 32 дугаар бажыңда, Тываның Дээди Хуралының (парламент) бажыңында, “Чаңгыс демниг Россия” партияның хөй-ниити хүлээп алыышкын черинде, Донецк база Луганск улус республикаларның чурттакчыларынга дузаламчы чыыр пункт ажылдап турарын сагындыраал.
