ТР-ниң Экономиктиг хөгжүлде болгаш үлетпүр яамызы «Шынчы демдек» системага бараанны албан демдектээриниң дугайында халас өөредилгеге киржиринче сонуургалдыг кижи бүрүзүн чалаан.
Январьның 16-дан 30-ге чедир ол онлайн хевирге эртер. Хөй-ниитиниң чемненилге черлериниң, садыглаашкын, аъш-чем бүдүрүлгези болгаш садып-саарылгазы, чиик үлетпүр, идиктер бүдүрүлгези, БАД-тар, ветеринарлыг болгаш эмчи продукциязы, автокезектер, бажыңга ажыглаар химиктиг бүдүмелдер, косметика болгаш өске-даа адырлардан сайгарлыкчылар болгаш тускай мергежилдиглер ооң дыңнакчылары болуп болур.
Өөредилге программазында ГИС-тиң хуу кабинединге барааннар саарылгазын хайгаараары, документ-саавырларны дужаарын болгаш хаарын долдурары, продукцияны садыг-саарылгаже киирери болгаш катап демдектээри, ол ышкаш эрге-хоойлу-дүрүмнеринде өскерлиишкиннер, албан демдектээринге белеткээри болгаш бараанның санын чизелээриниң дугайында практиктиг кичээлдер эртер.
Бараан-сараан бөлүктериниң удутукчулары болгаш демдектээр система операторунуң эксперттери өөредилгени эрттирер. Киржилге халас болур. «Шынчы демдек» честныйзнак.рф/lectures/ албан езунуң сайтызында долу графикти болгаш бүрүткедирин салган.
Декабрьда республиканың сайгарлыкчылары ТР-ниң Экономиктиг хөгжүлде болгаш үлетпүр яамызының, сайгарлыкчы чорукту деткиир регионалдыг фондунуң база Росхереглелхайгаарал эргелелиниң «Шынарлыг болгаш чижилгелиг экономика» национал төлевилел күүселдези-биле кады организастааны «Шынчы демдек» системазын ажыглаарының дугайында семинарга киришкенин сагындыраал.
Эксперттер бедик камгалалдыг электроннуг ат салыышкынындан эгелээш, касса болгаш бухгалтер программаларын тургузуп алырынга чедир системага коштунарын тайылбырлаан. Олар эге чадазында ниити частырыгларга болгаш хоойлу хажыдыышкыннары дээш административтиг харыысалгага хамаарыштыр тайылбырны база чоруткан.
Росхереглелхайгааралдың регионалдыг эргелелиниң тускай мергежилдиглери сөс алгаш, уруглар ойнадыр болгаш хөгледир черлерге хамаарыштыр санитар-эпидемиологтуг негелделер дугайында тайылбырны берген.
«Шынчы демдек» дээрге аңгы-аңгы барааннарны демдектээрин база кайда чоруп турарын хайгаараар национал система-дыр. Ооң сорулгазы – хоолгалаан болгаш шынары чок продукцияны садып-саараарын болдурбазы болур. Бараанны демдектээри бараан саарыкчыларының шупту киржикчилерин – бүдүрүкчүлерден болгаш импортерлардан эгелээш, чурагайлыг садыг шөлдери база хереглекчилерге чедир хаара тудуп турар. Демдектээн барааннарны национал каталогче киирер, ында бараан бүрүзүнге ооң шынарын, чөпшээрел документилерин, деңзизин болгаш өске-даа талаларын айыткан медээлиг карточказы бар. Каталог шупту киржикчилерге ажык болгаш халас.
Бараан шимчээшкининиң дугайында медээлерни бизнеске халас берип турар. Бо медээлер сайгарлыкчыларга рынок шимчээшкинин сайгарып, кайнаар нептередип тарадырын таарыштырып, иштики ажылдарны чурумчудар.
«Шынчы демдек» системазы бараанның шынныын болгаш шынарын садып алыкчыга магадылаар. Бараанны албан маркалаары бизнеске, хереглекчилерге болгаш күрүнеге-даа ажыктыг.