Тываның шериг комиссариаттарының ажылдакчыларын шаңнаан

Бөгүн Кызыл хоорайга келдириишкин кампаниязында киржип турар шериг комиссариаттарының ажылдакчыларынга, келдириишкин комиссияларының даргаларынга болгаш эмчилеринге, элээн каш албан черлериниң төлээлеринге сургакчы-методиктиг чыыш болуп эрткен.

Чыыштың кол сорулгазы – эрткен келдириишкин кампаниязының түңнелдерин үндүрери, тускай мергежилдиглерниң аразында дуржулга солчулгазы, оларның мергежилин бедидери, келир үеже сорулгалар салыры болгаш ажылдың үре-түңнелин бедидери.

ТР-ниң Дээди Хуралының мурнундан депутат Эрес Хуурак чыылган чонга байыр чедирген.

– Тыва Республикавыс келдириишкин кампаниязын кезээде бедик деңнелге эрттирип турган. Силерниң мергежилдииңерниң ачызында шупту көргүзүглер база катап чедип алдынар. Тывадан шеригже чаа келдирткен оолдарывыс Россияның Чепсектиг Күштеринге төлептиг немелде күш болурунга бүзүрээр бис – деп, депутат демдеглээн.

Хурал үезинде шаңнал тыпсыр езулал база болган. Эрес Хуурак шериг комиссариаттарының ажылдакчыларынга Тываның Баштыңының Өөрүп четтириишкин бижиктерин, «Тыва Арат Республиканың 100 чылы» юбилейлиг медальдарны болгаш Дээди Хуралдың Хүндүлел бижиктерин тывыскан.