Тываның школаларында дүштеки чемге чаа өртек тургустунган

Республикада эге школа өөреникчилеринге изиг чемниң өртээн 64,56 рубль турганындан, 85, 25 рубль чедир өстүрген. Тываның Чазаа бо неделяда чогуур доктаалды бадылаан, ТР-ниң Өөредилге яамызы аъш-чем өртээниң өскени-биле дүштеки чемниң төлевири өскенин тайылбырлаан.

Ыраккы Соңгу чүкке деңнештирген Тываның чедери берге черлери –
Мөңгүн-Тайга, Тожу база Тере-Хөл кожууннарже аъш-чем чедирилгези, чем белеткээриниң чарыгдалдары улуг болганын өөренип көргеш, изиг чем өртээн улгаттырган. Чижээ, Мөңгүн-Тайганың школаларында дүштеки чем өртээ 98 рубль 3 копеек болур болза, Тожу биле Тере-Хөлде – 93 рубль 77 копеекке дең.

Ниитизи-биле 29810 уругну изиг чем-биле хандырары көрдүнген. Октябрьның 1-ден Тываның шупту школаларында дүштеки изиг чемге чаа өртек тургустунган.