Тываның шупту школаларынга бот-идепкейжи уругларның төптери ажыттынар

Эрткен неделяда республиканың элээн каш школаларында кичээлден дашкаар болгаш немелде өөредилге хемчеглери эрттиреринге тускай дерип, шимээн өрээлдерни уругларның хөй-ниити каттыжыышкыннарының идепкейжилеринге база дагдыныкчыларынга ажыткан.

Төптер ажыдар саналдарны директорнуң уруглар кижизидилгези болгаш хөй-ниити каттыжыышкыннары-биле ажыл чорудар чөвүлекчилери идип үндүрген.

«Чаш назынның навигаторлары» федералдыг төлевилел чорудуу-биле ол тускай мергежилдиглер республиканың 105 школазында база ортумак профессионал өөредилгениң 13 өөредилге албан черинде ажылын чорудуп турар.

Сөөлгү неделяда бот-идепкейжи уругларның төптери Тываның кадет корпузунда, Кызыл кожууннуң Кара-Хаактың, Каа-Хем кожууннуң Сарыг-Септиң 2 дугаар база Бүрен-Хем школаларында ажыттынган. Ол школаларның уруглары боттарының бодалдарын сайгарып, төлелевилелдерин боттандырып чугаалажырда чыглыр, чыыштар эрттирер аянныг, эптиг черлерлиг апарган.

Бот-идепкейжи уругларның төвү – директорнуң кижизидилге ажылының талазы-биле чөвүлекчизиниң ажылдаар чери база болур.
Чаа өөредилге чылының эгезинде республика школаларынга 20 төп турган болза, ам оларның саны 82 чеде берген. Бо чылдың төнчүзүнге чедир кижизидилге талазы-биле чөвүлекчилер ажылдап турар шупту школаларга база техникумнарга ындыг төптер ажыттынар.

– Чөвүлекчилер ажылдап эгелээн үеден эгелээш, амгы үеде кижизидилге ажылы хайым апарган. Чөвүлекчилер күзелдии-биле ажылдап, өөредилге чорудуунда кижизидилгениң чаа арга-хевирлерин ажыглап турар апарганындан, уругларга солун болу бергени эң чугула – деп, «Чаш назынның навигаторлары» федералдыг төлевилелдиң регионалдыг координатору Сергей Лопсан чугаалаан.

Сергей Лопсанның чугаазы-биле алырга, өөредилге черлеринде чөвүлекчилер ажылдап эгелээн соонда, школа музейлери, театрлар, медиатөптер, улуг класстарның школаның өөредилге бот-башкарыкчылары, «Баштайгыларның шимчээшкини» эге салбырлар, спортчу, шериг-ада-чуртчу база турисчи клубтар болгаш сонуургалдар аайы-биле бөлгүмнер саны немешкени демдеглеттинген.

Чөвүлекчиниң бир кол сорулгазы – профилактика даңзызында уругларның кичээлден дашкаар үезин база немелде өөредилгезин шын организастаарын чедип алыры.