Чылдың-на республиканың социал албан черлериниң материал-техниктиг байдалын экижидип, социал ачы-дуза алыкчыларның айыыл чок чоруун хандырары-биле планныг ажылдарны чорудуп турар.
Бо чылын Ак-Довурак хоорайда болгаш Тес-Хем кожуунда Өг-бүлеге болгаш уругларга социал дуза чедирер төптерде үндезин септелгени эгелеп, Кызылда назылап-кыраан болгаш шимчеп албас хамаатыларга дазылга бажыңының канализация системазын чаартып турар. ТР-ниң Күш-ажыл болгаш социал политика яамызы ол ажылды удуртулгада алган.
Тес-Хем кожууннуң Өг-бүлеге болгаш уругларга социал дуза төвүнде септелге ажылдары бо чылдың апрель 1-де эгелээн болгаш август 1-де доостур ужурлуг. Аштанып-чунар черлерни чаартып, электри удазыннарын солуп, ханаларын болгаш дээвиирин септээн.
– Бо өскерлиишкиннер бистиң төптен дуза дилээн уругларга болгаш өг-бүлелерге таарымчалыг болгаш айыыл чок байдалдарны хандырар. Амгы үениң инфратургузуу бистиң албан черивисте ачы-дуза чедирилгезин экижидер – деп, төптүң директору Ай-Кыс Оюн чугаалаан.
Ак-Довурак хоорайның Өг-бүлеге болгаш уругларга социал дуза төвүнде шаланы солуп, өрээлдээш, ханаларның, дээвиирниң иштики шеверлел ажылын кылыр. Оон аңгыда электри чырыын, одалга системазын, суг хоорзаларын база канализацияны, өрт медээчизин септээн.
Кызылдың дазылга бажыңының канализация системазын бүрүнү-биле солуур. Амгы үеде аштап-арыгланыр черлерниң хоорзаларын солуур ажылдарны кылып турар.
ТР-ниң Күш-ажыл яамызы Хайыраканның дазылга бажыңының чырык удазынарын солуур электри эптелгезиниң ажылдарынга садыглажылганы белеткеп турар.
Үстүнде айыттынган албан черлериниң үндезин септелгелеринче республика бюджединде 15 сая рубльди аңгылаанын албан чери дыңнаткан.
