Тываның студентилери аныяктарның делегей фестивалында киржип турар

Сочиде «Сириус» федералдыг шөлчүгеште эгелээн делегейниң аныяктар фестивалы делегейниң 180 чуртундан аалчыларны хаара туткан.

Тываның дээди болгаш ортумак тускай өөредилге черлериниң студентилери, республиканың күш-ажыл организацияларның тускай мергежилдиглери – 17 аныяктар ында киржип чеде берген. Аңгы-аңгы чурттардан артистерниң самы, хөгжүмү, ыры-шоорундан тургустунган театржыткан көргүзүг-биле фестиаль ажыттынган.

Президент Владимир Путинниң делегейниң аныяктарының кады ажылдажылгазын хөгжүдер дээн даалгазы-биле, Федералдыг аныяктар херектериниң талазы-биле агентилел аныяктарның делегей чергелиг фестивалын организастаан.

Бистиң республиканың аныяктары өөредилге, эртем, чоннар аразының кады ажылдажылгазы, культура, эки турачы база ачы-буян чедирилгези, спорт, бизнес, медиа адырындан 20 муң хире оолдар, кыстарның санынче киргенинге өөрүп турарын Тываның Баштыңы Владислав Ховалыг бодунуң блогунда бижээн.

Оолдар, уруглар мындыг улуг хемчээлдиг фестивальга киржир дээш, хөй чадалыг мөөрей шилилдезин эрткен – комиссияның шылгалдазынче эссе, видеотаныштырылганы чоруткаш, онлайн чугаалажылганы кылган.

– Программаны идепкейлиг шиңгээдип, чаа эш-өөр-биле таныжып, найыралдашкан. Мальдивы Республикадан Худ дээр чаа эжи Тываның дугайында хөйнү билир болганы, оолдарны кайгаткан. Чаа өңнүүн «кажыктаарынга» өөреткеш, суй-белекти сунган – деп, Тываның Баштыңы дыңнаткан.

Фестивальдың программазы чымыштыг: интерактивтиг чогаадылга база өөредилге шөлдери, эки турачы акциялар, спортчу маргылдаалар, кинолекторийлер база дискуссиялар хөй. Оон аңгыда, ат-сураглыг эксперттерниң аңгы-аңгы угланыышкыннарында лекцияларынга киржир арга бар.